فودافون والعمل الخيري

كنت –ولازلت- مؤمن دايما ان فودافون شركة بجد محترمة وبتحترم عملائها الى اقصى الحدود ولما التحقت بيها بتوفيق من ربنا سبحانه وتعالي عرفت حاجات تانية زادت من احترامي للشركة من ناحية وزادت من غيظي من اسلوب

الدعاية اللي بيحرم ناس كتير من انها تكون عارفة الشركة دي تبقى ايه بالظبط
تباعا لتعليقي على اسلوب الاعلانات والدعاية اللي في اغلب الاوقات مش بيوصل المعنى بالكامل ..كان ليا تعليق بردو على عدم الاشارة بالشكل الكافي لانشطة الشركة الخيرية ومساهمتها في تطوير جوانب كتير من مجتماعنا بدون مايكون

ليها أي عائد في اوقات كتير زي حملات التشجير مثلا اللي محدش يعرف عنها حاجة واللي فودافون مش هتجني من وراها حاجة
أيا كان..كان في حديث حصل بيني وبين مجموعة من اصحابي وكنت باعرض وجهة نظري دي وبقول قد ايه انا مضايق ان الشركة مابتعلنش بالشكل الكافي عن انشطتها..واذا باحد اصدقائي يرد ويقولي " ماهو لازم ماتقولش عشان مايضيعيش عليها الثواب"...اجابة كانت غريبة جدا جدا مع احترامي لقائلها...ثواب ايه اللي الشركة عايزاه..دا بيزنس...شغل وفلوس ومصالح.؟؟؟الله طب مانت لسه قايل من شوية ان انشطة كتير مابيكونش ليها عائد ع الشركة امال فلوس ومصالح ايه؟؟؟؟
الاجابة هي في السطر التالي

Corporate Social Responsibility

المسؤولية الاجتماعية للشركة....ودا قسم موجود في الشركة..الناس اللي فيه شغلتها انها تراقب الانشطة الاجتماعية في المجتمع حوالينا وتقرر ازاي الشركة تساعد في تطوير الانشطة دي وايه الاجراءات اللي ممكن تتاخد ان كان عن طريق التبرع او التطوع او المشاركة ...ونيجي هنا لنقطة مهمة.....الشركة بتعمل كده ليه؟ ايه العائد الحقيقي عليها؟؟

اولا- الشركة ككيان ناجح في المجتمع لازم يكون ايجيابي ويتفاعل مع مشاكل المجتمع اللي موجود فيه ويساهم في حلها..ودا مش كلام انشاء لا دا حقيقي وموجود ومحسوس جدا وهتكلم عنه بالتفصيل في بوستات تانيه كتير اوضح فيها فعلا ان فودافون مش مجرد شركة بتشتغل وتكسب وبس..لأ..دا كيان مسؤول في المجتمع ومشارك رئيسي فيه
ثانيا- دي سمعة كويسة للشركة عشان الناس تحس وهي بتدفع فلوسها ان الفلوس دي جزء منها فعلا بيروح في عمل الخير وتطوير المجتمع حتى وان كان العمل ده مالوش تأثير مباشر عليهم
ثالثا:- هي اعلانات غير مباشرة بتقولك بالظبط شركتك بتعمل ايه وزي مابتقدملك الخدمة هي بردو عايشه معاك

طب حاجة كمان...امال ثواب زيارة الايتام ودور المسنين والحملات الطبية والحاجات دي بتروح لمين...لعم فودافون الكبير؟؟ لأ طبعا..الشركة لما بتقوم بأي نشاط بتطلب متطوعين من الموظفين في كل مرة 10 او 30 او 40 على حسب النشاط..وهما دول بقا اللي بياخدوا ثواب الخير وهما دول اللي المفروض يعملوا زي ماصاحبي قال " مايعلنوش عن اللي هما بيعملوه عشان مايضيعوش الثواب"ء

دي كانت مقدمة بسيطة عشان اقول ليه بيكون في نشاط خيري في مؤسسه او شركة هدفها الاول طبعا هو النجاح والربح وان شاء الله تباعا هاتكلم عن الانشطة دي بالتفصيل

ليلة العيد

كل سنة وانتوا طيبين ياجماعة...رمضان خلص والعيد عدى وبعودة الايام

حبيت يكون اول بوست ليا بعد العيد هو ذكرياتي عن ليلة العيد مع فودافون وما ادراك ما ليلة العيد
على مدار السنة بيكون في مناسبات واعياد معروفة زي عيد الفطر وعيد الاضحى وشم النسيم وليلة رأس السنة

وغيرها دا طبعا بالاضافة لماتشات الاهلي والزمالك والبطولات الدولية المقامة في مصر واي حدث تاني تقرر الناس في بلدنا انه مهم حتى ولو كان عيد ميلاد...المناسبات دي كلها بتكون معمول بيها اجندة معينة ومحددة التواريخ والاجراءات ومجرد ماتعلن الاجندة اقتراب يوم العيد بيتحول قسم التكنولوجيا في الشركة الي ثكنة عسكرية..ترفع الرايات وتدق الابواق وتبدأ الاجراءات.. بيتم رفع كفاءة الشبكة بشكل خاص باوقات الذروة وبيتم تدعيم الوصلات الخاصة بها واللي بتربطها بباقي الشبكات وبتتاخد اجراءات تانية كتير مش هاعرف اتكلم عنها لكن هدفها كله بيكون

رفع كفاء الشبكة وتزويدها بالقدرة اللي تخليها تصمد قدام طوفان المكالمات والرسايل في العيد

ومجرد ماتتحدد ليلة العيد تتحول غرفة مراقبة الشبكة الي مركز قيادة عسكرية حيث الشاشة الكبيرة تتوسطها خريطة جمهورية مصر العربية موزع عليها اماكن التغطية وبرامج خاصة (مبدعها مصرييون) لمراقبة عمل الاجهزة

ومؤشرات الحمل وزيادة المكالمات في اتجاه معين (يعني من القاهرة لاسكندرية مثلا او من الدقي لمصر الجديدة)ء

بالاضافة طبعا لمراقبة الاجهزة الخاصة بالرسائل القصيرة ومحطات التقوية... وامام الشاشة تتناثر اجهزة الكمبيوتر يجلس عليها مجموعة من المهندسين من كل الخبرات و الفئات والاختصاصات..ههههه..تلاقي بتاع الرسايل مع بتاع المكالمات والفيديو مع بتاع اللايف مع بتاع الشبكات ...كل واحد قاعد مركز في اللي هوه فيه وعينيه على الاجهزة كلها ومستعد لاي كارثة تحصل
بيكون يوم عصيب فعلا وبيبتدي الضرب على المغرب كده وبتتصاعد حده المعركة لتصل لذورتها من العاشرة مساءا

الي منتصف الليل وتبدأ حدتها في الانخفاض حتى تتنتهى مخلفة ورائها بقايا مهندسين على الساعة الثانية صباحا حينها تهدأ الامور.....ليلة العيد بتكون ليلة ليلاء على اللي موجودين في الشركة...انا فاكر السنة اللي فاتت ان انا وزمايلي زودنا سعة الاجهزة 184 مرة خلال 3 ساعات من كتر الضغط ع الشبكة وكان يوم ما يعلم بيه الا الله ورجعت البيت مدمر
وكله كوم...كله كوم...وتاني كله كوم وليلة رأس السنة دي كوم لوحدها..حيث تتحد الامال والامنيات وتتلاقى القلوب مع النظرات ولا يتبقى الا الدعوات وتتحد العيون كلها في اتجاه شاشة المراقبة الضخمة وفي لحظة واحدة عند الساعة الثانية عشرة صباحا حيث يبدأ العام الجديد بصرخة الاجهزة وارتفاع المعدلات في وقت قياسي وبصورة جنونية لدقائق

قليلة يعود بعدها كل شخص الي مكتبه لينقذ مايستطيع انقاذه وليلملم اشلاء الاجهزة التي تطايرت من فرط قوة الضربة...ضربة ملايين المكالمات في نفس اللحظة.دي بقا بتكون ليلة تحكيها لاولادك واحفادك من الاثارة اللي بتكون فيها

طبعا رغم الاجراءات اللي بتتاخد دي بيكون في بعض المشاكل لكن الناس بتكون موجودة عشان تحلها وبتكون ليها الاولوية..لكن في مشاكل تانية بتحصل مش بيكون ليها حل غير الصبر والانتظار ... زي شعورك وانت بتنزل ويندوز جديد على جهازك وفجأة الكهرباء تقطع او الجهاز يعمل ريستارت بدون أي سبب مقنع..بيكون شعورك ايه وقتها؟
كل سنة وانتوا في عيد والخير فيه يزيد ويزيد

العيد رنة

كل عام وانتم بخير
يعني
كل سنة وانتوا طيبين
وللموبايلات شاحنين
وللشبكة لاقطين
وللفاتورة دافعين
وللمكالمات مظبطين
وان شاء الله السنة الجايه
تكونوا كلكوا فودافونيين
واحتفالا بالعيد السعيد
وتظبيط التظابيط
المدونة خارج نطاق الخدمة
والمدون فاصل شحن
وبعد العيد
نحكي ونقول
عن خيمة فودافون الخيرية
وحملات الرعاية الصحية
ونحكي عن الجيل التالت
والتالت ونص كمان
ومعاه الجيل الفائت
ونقول اشهر الشكاوي
وسببها من غير حكاوي
ونرجع لعم فودا الكبير
وبنا المدارس والتشجير
وخيمة الايتام في رمضان
ومسابقة الرسم والالوان
ورعاية الاهلي وبطولاته
ومساعدة التلميذ في حياته
ونرجع للمحمول ورسايله
ورناته وصورة وافلامه
يعني كل عيد
والخير يزيد
وكل سنة
والفودافونيين
والموبينيليين
والاتصالاتيين
طيبيين

كلمنى شكرا

لما ابتدت تكنولوجيا التليفون المحمول في مصر كانت الخدمة غالية اوي في اولها وكان عشات تعمل تليفون لحد هتدفع فلوس كتير وحتى الرسايل كانت خدمة جديدة علينا ومش كل الناس عندها لا الصبر ولا الخلفية اللي تقدر تكتب بيها رسالة على المحمول وتبعتها وهي مطمنة ان الرسالة هتوصل او ان اللي هتوصلة هيفهمها او حتى هيقدر يقراها....وكالعادة وامام التحديات ابتكرت مصر تكنولوجيا الميسدات...اديني رنة....رنلي...ياميسداتك يامعلم...دا حتى بقا في محلات اسمها "ميسد كول"...وبقت لغة بين الناس..رنلي مرة واحدة اكلمك..رنلي مرتين اعرف انك مشغول..رنة طويلة يبقا انت هتنام..وهكذا بقت لغة فعلا وفي نفس الوقت بقت صداع لشركات المحمول واي صداع

انا بس حابب اقول حاجة صغيرة في الاول وهو الفرق بين التليفون الثابت والموبيل...في التليفون الثابت انت في كابل او سلك واصل بينك وبين السنترال..هترفع السماعة هتلاقي حرارة وتضرب الرقم هتقول الو...الكابل واصل بينك وبين السنترال ومن الناحية التانية واصل بين السنترال وبين التليفون التاني ولمكالمة ماشية زي القطر على قضبان لا بتروح يمين ولا شمال وانت في مكانك وهو كمان

انما الموبيل حاجة تانية...انت عشان بس ترن رنة في اكتر من عشرين عملية بتتعمل في الشبكة دا غير الاجهزة اللي الاشارة بتعدي عليها وبتستخدمها...وعلى عكس القطر اللي ماشى على قضبان في التليفون الثابت..مكالمة الموبيل بتكون عاملة زي العربية من غير فرامل في طريق واسع لازم حاجة تتحكم فيها عشان كده بتكون في اشارات لاسلكية تانية مهمتها بس انها تتحكم وتوجة المكالمة..من التليفون للمحطة اللي فوق الاسطح ومن المحطة لنقطة التحكم ومن نقطة التحكم للسنترال الرئيسي غير طبعا الاشارات التانية اللي عن طريقها بنتاكد من ان الرصيد كافي وعن طريقها بندور على مكان الراجل اللي بنتصل بيه واللي بردو بنشوف انت نفسك بتبعد ولا بتقرب عن المحطة عشان لو الاشارة ضعفت تنقل على محطة تانية........الكلام ده كله واكتر بيحصل وانت بتدي رنة...بيكون في حوار بين الموبيل والمحطة اللي لاقط منها الاشارة ( حوار بمعنى الكلمة- يعني سؤال واجابة واستفسار ورد)...الحوار ده بيشغل المحطة في الوقت اللي ممكن تخدم فيه حد تاني او تليفون تاني هيعمل مكالمة..غير ان اشارات التحكم اللي اتكلمت عليها بردو بتستهلك ع الفاضى وانت بترن...انت عارف مجرد ما المكالمة تبتدي..خلاص كل الاشارات دي بتروح لحالها طالما المكالمة ابتدت والناس سمعت بعضيها...كل الاشارات دي بتكون خلصت مهمتها ما عدا الاشارات المسئولة عن التحكم في حركة التليفون عشان المكالمة ماتقطعش وانت بتتحرك.... الاشارات دي هي الصداع بالنسبة لشركات المحمول..انت بتستهلكني بدون ما تستفيد منى ولا تفيدني ...الرنة بتحصل في حوالي 3 او 4 ثواني وده بالنسبة لاشارات المحمول عمر مديد...ممكن تتخيلها لو قلتلك انك عشان تكون لاقط شبكة ع الموبيل...بيكون في حوار بين الموبيل والمحطة (اللي فوق المنازل) 400 مرة في الثانية.....متخيل عشان بس تكون لاقط شبكة وتليفونك معروف

وعشان كده ومع العدد الرهييييييب من الرنات والميسدات اللي الشبكة بتشيلها كان لازم يكون في حل تاني...وقد

كان...كلمني شكرا...3 رسايل في اليوم مجانا وباستخدام كود سهل عشان ماتكتبش حاجة..وبكده اقدر اقلل ولو 30% او 40% من عدد الميسد كول
ميزة الرسايل عن المكالمات...ان الرسالة مش لحظية..يعني ممكن توصل متاخرة ثانية او اتنين او حتى 30 ثانية انما المكالمة لو اتاخرت ثانية واحده الكلام هيدخل في بعضة ومش هتفهم حاجة من اللي بيكلمك. كمان حاجة ان الرسالة بتمشى عن طريق تاني خالص....دي بتتبعت لجهاز معين بيخزن كل الرسايل وبعدين يبدأ يبعتها واحدة واحدة من عنده زي مكتب توزيع البريد بالظبط وبعيد عن الشبكة الرئيسية اللي شايلة المكالمات يعني مش هشغل حاجة في الشبكة

ء"كلمني شكرا "كانت الحل السحري لشركات المحمول عشان تنقذ نفسها من براثن الميسد كوول وتتحكم في معدل استنزاف الشبكة بسبب المكالمات الغير كاملة وكانت بالنسبة للعميل خدمة حلوة بتوصل كلامة مفهوم اكتر ومن غير مايكتب وحتى لو مكانش معاه رصيد
يعني الشركات كسبت والعميل كسب
والناس بقت بدل ماتقول اديني رنة بقت تقول كلمنى شكرا