كل سنة وانتوا طيبين ياجماعة...رمضان خلص والعيد عدى وبعودة الايام
حبيت يكون اول بوست ليا بعد العيد هو ذكرياتي عن ليلة العيد مع فودافون وما ادراك ما ليلة العيد
على مدار السنة بيكون في مناسبات واعياد معروفة زي عيد الفطر وعيد الاضحى وشم النسيم وليلة رأس السنة
وغيرها دا طبعا بالاضافة لماتشات الاهلي والزمالك والبطولات الدولية المقامة في مصر واي حدث تاني تقرر الناس في بلدنا انه مهم حتى ولو كان عيد ميلاد...المناسبات دي كلها بتكون معمول بيها اجندة معينة ومحددة التواريخ والاجراءات ومجرد ماتعلن الاجندة اقتراب يوم العيد بيتحول قسم التكنولوجيا في الشركة الي ثكنة عسكرية..ترفع الرايات وتدق الابواق وتبدأ الاجراءات.. بيتم رفع كفاءة الشبكة بشكل خاص باوقات الذروة وبيتم تدعيم الوصلات الخاصة بها واللي بتربطها بباقي الشبكات وبتتاخد اجراءات تانية كتير مش هاعرف اتكلم عنها لكن هدفها كله بيكون
رفع كفاء الشبكة وتزويدها بالقدرة اللي تخليها تصمد قدام طوفان المكالمات والرسايل في العيد
ومجرد ماتتحدد ليلة العيد تتحول غرفة مراقبة الشبكة الي مركز قيادة عسكرية حيث الشاشة الكبيرة تتوسطها خريطة جمهورية مصر العربية موزع عليها اماكن التغطية وبرامج خاصة (مبدعها مصرييون) لمراقبة عمل الاجهزة
ومؤشرات الحمل وزيادة المكالمات في اتجاه معين (يعني من القاهرة لاسكندرية مثلا او من الدقي لمصر الجديدة)ء
بالاضافة طبعا لمراقبة الاجهزة الخاصة بالرسائل القصيرة ومحطات التقوية... وامام الشاشة تتناثر اجهزة الكمبيوتر يجلس عليها مجموعة من المهندسين من كل الخبرات و الفئات والاختصاصات..ههههه..تلاقي بتاع الرسايل مع بتاع المكالمات والفيديو مع بتاع اللايف مع بتاع الشبكات ...كل واحد قاعد مركز في اللي هوه فيه وعينيه على الاجهزة كلها ومستعد لاي كارثة تحصل
بيكون يوم عصيب فعلا وبيبتدي الضرب على المغرب كده وبتتصاعد حده المعركة لتصل لذورتها من العاشرة مساءا
بيكون يوم عصيب فعلا وبيبتدي الضرب على المغرب كده وبتتصاعد حده المعركة لتصل لذورتها من العاشرة مساءا
الي منتصف الليل وتبدأ حدتها في الانخفاض حتى تتنتهى مخلفة ورائها بقايا مهندسين على الساعة الثانية صباحا حينها تهدأ الامور.....ليلة العيد بتكون ليلة ليلاء على اللي موجودين في الشركة...انا فاكر السنة اللي فاتت ان انا وزمايلي زودنا سعة الاجهزة 184 مرة خلال 3 ساعات من كتر الضغط ع الشبكة وكان يوم ما يعلم بيه الا الله ورجعت البيت مدمر
وكله كوم...كله كوم...وتاني كله كوم وليلة رأس السنة دي كوم لوحدها..حيث تتحد الامال والامنيات وتتلاقى القلوب مع النظرات ولا يتبقى الا الدعوات وتتحد العيون كلها في اتجاه شاشة المراقبة الضخمة وفي لحظة واحدة عند الساعة الثانية عشرة صباحا حيث يبدأ العام الجديد بصرخة الاجهزة وارتفاع المعدلات في وقت قياسي وبصورة جنونية لدقائق
وكله كوم...كله كوم...وتاني كله كوم وليلة رأس السنة دي كوم لوحدها..حيث تتحد الامال والامنيات وتتلاقى القلوب مع النظرات ولا يتبقى الا الدعوات وتتحد العيون كلها في اتجاه شاشة المراقبة الضخمة وفي لحظة واحدة عند الساعة الثانية عشرة صباحا حيث يبدأ العام الجديد بصرخة الاجهزة وارتفاع المعدلات في وقت قياسي وبصورة جنونية لدقائق
قليلة يعود بعدها كل شخص الي مكتبه لينقذ مايستطيع انقاذه وليلملم اشلاء الاجهزة التي تطايرت من فرط قوة الضربة...ضربة ملايين المكالمات في نفس اللحظة.دي بقا بتكون ليلة تحكيها لاولادك واحفادك من الاثارة اللي بتكون فيها
طبعا رغم الاجراءات اللي بتتاخد دي بيكون في بعض المشاكل لكن الناس بتكون موجودة عشان تحلها وبتكون ليها الاولوية..لكن في مشاكل تانية بتحصل مش بيكون ليها حل غير الصبر والانتظار ... زي شعورك وانت بتنزل ويندوز جديد على جهازك وفجأة الكهرباء تقطع او الجهاز يعمل ريستارت بدون أي سبب مقنع..بيكون شعورك ايه وقتها؟
كل سنة وانتوا في عيد والخير فيه يزيد ويزيد
كل سنة وانتوا في عيد والخير فيه يزيد ويزيد
20 comments:
تسجيل حضور يا باشا
وقرييييييبا هرجع تاني
كل سنة وفودافون بخير
بصراحة ربنا يكون مع كل العاملين بجد الحمد لله السنة دة ولا الخدمة وقفت ولا الرسايل اتعطلت بالعكس كلها وصلت الحمد لله
بجد جهد مشكورين علية وياريت بجد تبلغهم شكرى والله مش مجاملة بس بجد هما دول اولاد بلدنا الى لما يحبوا يعملوا شى بيعملوة
الله يكون في عونكم يا عم كلامك بجد حسسني قد ايه بتتعبوا عشان توصلوا خدمة فودافون للناس
عاوزك كده تاكل كويس يا باشا عشان تجمد كده ههه وتكون قد الحمل الكبير ده اللي يقصم الظهر
الله يكون في عونكم بجد
تحياتي لك محمد
مش عارفة أقولك إيه ؟؟
والله جسمي قشعر لما حسيت الضغط اللي بيبقى عليكم ده
الله يعينكم علينا
منى
أول حاجة جات على بالي و انت بتتكلم عن زحمة الشغل ليلة العيد معرفش ليه افتكرت الحلاق :)
بس بيني و بينك الحاجات دي هي اللي بتخلي الأعياد ليها طعم و لون و ريحة و كل سنه وانتو طيبين
مبروك المدونة جات متأخر
كل سنه وانت بخير وليله عيده سعيده عليك ولو انها متاخره
بص يا باشا طول عمرنا بستسهل المسدات والرسائل القصيره بس بعد ما عرفت طريق البلوج بتاعك
كلمه حق واللهى العظيم الف شكر ليكى ولكل العاملين فى الشركه وربنا يصبركم على مسداتنا
---واحد باشا--
في انتظارك
---ايوية---
ربنا يخليكي يا ايه ع المجاملة الجميلة دي
وكفاية الاحساس ان الشبكة شغالة تمام واي مكالمة بتوصل كويس
دا كفاية اوي لراحة الناس الشغالة
نورتيني يا ايوية العزيزة
---واحد باشا---
عود احمد
ياباشا الف شكر ع الدعوة الجميلة دي
الحمد لله كل واحد بيعمل اقصى مايقدر عليه
الشغل شغل حتى لو كان متعب
نورتني ياكبير
---وحدانية---
ربنا يخليكي يامنى
شعور طيب منك
---الانكشاري---
ههههه حلاق؟ ماشي ياعم
مقبولة منك
بس الفكرة ان الحلاق بيشتغل على دماغ واحدة بس
احنا بنشتغل على ملاييين المكالمات في نفس الوقت
ربنا يعيننا جميعا
كل سنة وانت بالف خير ياباشا
---عروس البحر---
الله يبارك فيكي
---رئيس جمهورية نفسي---
ياباشا كل سنة وانت طيب وبالف خير
طالما في خدمة موجودة للناس يبقى الكل لازم يستخدمها
الفكرة ان احنا نستخدمها صح
واحنا في الشركة بجد هدفنا ان كل واحد يتكلم في الموبيل رسالته وصوته يوصلوا واضحيين وعشرة على عشرة
مهما كان التعب
نورتني
تحياتي
محمد سمير
ياااااااااااه كل ده بيحصلك يا ابو سمرة وكاتم فى نفسك
واحشنى والله يا ابو سمرة
انت اخبارك ايه وعامل ايه ابقى طمنا عليك بس يا سيدى
وربنا يوفقك يا رب
العزيز محمد
إنت فودافون
وأنا موبينيل
ههههههه
كل سنه وانت طيب
إنت عارف دايما أسلوبك فى الوصف بيشدني
وبيحسسني إني داخل الحدث
ربنا يكون في عونكم
بس أنا برضه موبينيل
ههههههههه
بس إنت ليه غيرت لون المدونه المميز لفودافون؟
تحياتي
---عبده باشا محتاس---
هنعمل ايه بس ياكبير
الشغل شغل بقا
كل سنة وانت طيب ويارب دايما امورك طيبة
نورتني ياباشا
---اومي---
كل سنة وانتي طيبة يالمياء
ياموبينيل
انتي نورتيني هنا والله ويارب المدونة تكون عجباكي حتى لو موبينيل
بس لون ايه اللي انا غيرته
ما المدونة زي ماهي من يوم ما ابتدتها
نورتيني
تحياتي
محمد سمير
ههههههههههه
بقايا مهندسين
هههههه
احسن تستاهل يا محمد
وبعدين انا عمرى ما حاولت اتصل بحد الساعة اتناشر ليلة رأس السنة ونفع ابدا
تقولش الناس محموقين اوى
عموما السنة الجاية ان شاء الله مفروض تفرقو على العملاء كحك وغوريبة
وفى الحالة دى هنضم لمعسكركم
هههههههه
بجد انا بحب مدونتك كل يوم اكتر
متميزة بجد
تحياتى
توقيع
واحد من معسكر الأعــــداء
هههههههه
والله ربنا يكون في عونكم فعلا
بس معلش اسمحلي
انا استنتجت من كلامك عن الأجهزة واللي بيحصلها بعد ما بتخلص اوقات الذورة اللي انت قلت عليها معنى ان الأجهزة بيحصل فيها دروبات ومشاكل انها مش مجهزة ولا مستعدة لستقبال مثل هذه الحالات ؟
!!
وتيجي على بالي الجملة المشهورة اوي
بياخدو فلوس اد كده من الشعب وبردو الخدمة زي الــ
معلش اعذرني يا محمد بس فعلا انا في العيد اللي فات ده على طول مفيش مكالمة عرفت اعملها من اول ولا من عاشر مرة اتصال حتى
لازم افضل ورا الرقم لحد ما يجيلي نقطة وكل مرة يديني تيييت تيييت تيييت الشبكة مشغولة
!!
تفتكر امتى هتظبط الحكاية؟
عارف بقى ان البوست دا بالذات
اخر جملة اطبقت معايا فيه
لاني دخلت وعلقت في المدونة الاصلية
ودخلت هنا وكتبت تعليقي
ومع اخر سطر هوب
الجهاز عمل ريستارت مع نفسه
قلت بركاتك يا عم محمد يا سمير
وفضل بقى على كدا
يفصل ويعمل ريستارت
ووالله انا بابقى عاذرة الجماعة بتوع شركات التليفونات دول
لان في الاعياد لما اججياتصل بحد او ابعت رسالة
مفيش حاجة بتمشي خالص
باحس بمدى الضغط اللي هم فيه
وباعذرهم جامد
علشان كدا
بقيت
باعمل مكالمات التهنئة قبل العيد بيوم او اتنين
تلافيا للي بيحصل دا
سلام يا عم
سمير الهلالي
الله الله الله
كان نفسي من زمان مدونة زي دي تتعمل
بجد مجهود جميل جدا واستفدت كتير
ربنا يكرمك
باشا و الله انا حاسس بكل الكلام اللي قريته عندك انا فودافوني عتيق و دايمي مشغل الرومنج و رافعين رأسي برة و جوة بس فية حركات قلة منكم شويه لكن كلة يهون مدام متغطين في كل مكان فرصة سعيدة يا باشا
---احمد الصباغ---
ياباشا لا معسكر اعداء ولا حاجة
انت منورني هنا
وبعدين ياباشا ما الشركة بتوزع دقايق ورسايل مجانية
عايز كحك وغريبة كمان
يلا اهو دلع عملا بقا هنعمل ايه
نورتني ياباشا
---الام وامال---
كل سنة وانت طيب ياباشا
كلامك الجميل دا في نقطتين احب ارد عليهم
اول حاجة موضوع الاجهزة مش بتكون مجهزة لاستقبال الحالات دي
أي حاجة في الدنيا لما تيجي تقيس مستوى الاداء بتاعها لازم تقيسه في الاوقات الطبيعية واه انا معاك لازم تاخد في حسبانك وقت زيادة الحمل...لكن حتى دي بيكون ليها حدود وحسابات تانيه خالص جزء كبير منها اقتصادي
وعايز اقولك على حاجة تانية ان الاداء بتاع الاجهزة في الاوقات العادية بيكون حوالي 40-50% المشكلة انه في المناسابات بيعدي ال 100% ودا اللي ساعات بيعمل مشاكل ودا اللي انا بحاول اقلله بالاجراءات اللي بتتاخد
ممككن تحسبها زي بالظبط لما تكون متعود تعزم ناس عند في البيت كل سنة لمدة يومين او تلاتة..ياترى هتشتري اوضة نوم مخصوصة لليومين دول ولا هاتحاول تتصرف في اليومين دول بالامكانيات المتاحة بدال ما الاوضة تقعد فاضية طول السنة
تاني تعليق هو موضوع الشبكة مشغولة....بكل بساطة هس دي المسكلة...الشبكة مشغولة...مش واقعة..لا مشغولة
ناس كتير بتتكلم
انا لوكان ينفع كنت وريتك منظر تحفة...كل الكونيكشنس بتكون بيزي..حاجة مابتحصلش كتير
يارب اكون وصلتلك قصدي من الكلام
ويكون كلامي خفيف
نورتني ياباشا والله
---ماعلينا----
بركاتك يامحمد ياسمير ايه بس
دي الهيبة بتاعتك بس
خوفت الجهاز وخلته يعمل ريستارت ويفصل
بس ماتبصلوش البصة دي تاني
احسن شوفتي اللي حصل
انا بقا بابعت رسايل التهنئة بتاعتي بالظبط مع ادان المغرب
وقت الفطار
بيكون كله همه على الاكل وسايب تليفونه
وقتها بتكون الشبكة عاملة زي الصحراء
ماحدش بيتكلم ولا بيبعت
تلاقي الرسايل وصلت ايه تقولشي راكبه صاروخ
ودايما ياباشا منورنا كده ومكترنا
سلام يازمرده
---عبد الله----
ياباشا ربنا يكرمك
اخجلتم تواضعنا والله
انت منورني وانا تحت امرك في أي سؤال او استفسار
---احمد مرعي---
ياباشا انا اللي اسعد ومبوسط بزيارتك وبكلامك الجميل
بس قولي ايه بس موضوع الحركات القلة دي واحنا نلاقيلها حل او يمكن يكون في سوء تفاهم
نورتني واتمنى تكرار الزيارة
تحياتي
محمد سمير
أنا كمان فودافون من ست سنين
شكرا ليك يا أستاذ محمد
فكرة المدونة لطيفة و مفيدة ف الوقت نفسه
فودافون شبكة قوية بس ف الفترة الأخيرة من شهرين مثلا بدأت الاتصالات تحصل فيها مشاكل صغيرة كده مكنتش بتحصل قبل كده زي صعوبة الاتصال يا ترى أيه السبب ؟
بالمناسبة بقى اسأل حضرتك على سؤالين مهمين :
الأول : هل لسة فيه أرقام مميزة 010 أو 0100 ؟ و هل بالسعر نفسه ولا سعرها أغلى ؟ و هل موجودة ف أي منفذ بيع خطوط ؟؟
الثاني : موضوع الخمس أفراد ب 5 ج ف الشهر مكالمات أو 60 رسالة هل ده معناه إنه لما انا اكلم الناس دي هكلمهم أرخص ولا لما هما يكلموني ولا لما هما يتكلموا عموما مش شرط ليا ؟ و هل لازم خمسة ؟
شكرا جدا لحضرتك
و جزاك الله خيرا
---ايمان الميهي---
سعدت كثيرا بزيارتك يا ايمان
وياستي اتشرفنا والله بكونك فودافونيه
بالنسبة لسؤالك
اول حاجة بخصوص المشاكل بتاعة الشبكة فخلال الفترة اللي فاتت وكان -ومازال- في اعادة تخطيط كاملة للشبكة وعملية احلال وتجديد لاجهزة كتير وخصوصا عشان الجيل التالت ويمكن لو تليفونك ممكن يشتغل ديول موود هتحسي بالفرق في بعض الاماكن اللي بيدخلها الجيل التالت
معلشي بس فعلا في ثورة جامدة جدا في الشبكة دلوقتي
ودا ساعات بيعمل شوية مشاكل
اما بالنسبة لاهم خمسة فال 60 دقيقة بتكون متوزعة بينيك وبين المشترك اللي معاكي في الجروب...يعني لو عندك اتنين مشتركين هيكون لكل واحد 60 دقيقة انتي تكلميه او هو يكلمك ال 60 دقيقة دي بتاعتكوا انتوا الاتنين واي واحد ممكن يخلصها ونفس الكلام بالنسبة للشخص التاني
وطبعا دا بردو ينطبق ع الرسايل
وبخصوص عدد الافرا\د فهما من فردين ل 5 افراد
معليشي مش بعرف اشرح العروض دي كويس
ع العمومو نورتيني جدا واتمنى تكرار الزيارة
تحياتي
محمد سمير
كلام جميل بس لاسف انا اتصالات وبحبها مع احترامي لفودافون الكامل بس انا عندي ولا جامد انشالله لبتاعت التفاح الي قدام البيت بتاعتنا الي مش ممكن اشتري من حد غيرها حتي لوعندة تفاح احسن منها
Post a Comment