Saturday, September 22, 2007

انا فودافون




انا فودافون...كلمة باعتز بيها كعميل فودافون من سنة 2000 وباتشرف حاليا بيها كموظف فيها....فودافون بالنسبة لناس كتير هي شريحة الموبايل اللي محطوط في جيبه وبيتكلم منه وزيها زي غيرها وبالنسبة لناس تانيه كتير بردو هي شركة (طبعا مع موبينيل واتصالات) بتمص في دم الناس وفي جيبوهم وبتسرقهم عيني عينك وناس تانيه كتير زي حالاتي كده مقتنعين بيها جدا جدا- انا كنت دايما معتز جدا بخطي الفودافون حتى في الايام اللي اشتغلت فيها مع موبينيل عشان كده انا حبيت اعمل المدونة دي اللي اتمنى انها تعجبكوا وانكوا تشاركوني فيها- انا ناوي ان شاء الله ابني مواضيع المدونة على تلات محاور ( زي فارس بلا جواد كده)ء


اولا..هاتكلم عن فودافون الاسرة والمجتمع الصغير والشركة اللي ناس كتير مايعرفوش حاجة عن انشطتها وتأثيرها في حاجات كتير في المجتمع المصري...هاتكلم عن مواقف بتحصلى وخصوصا اني على احتكاك مباشر بشبكة التغطية في بر المحروسة كله وبمشاكل العملاء وبمواقف ظريفة بتحصل كتير من العملاء وشكواهم

ثانيا.. هتكلم بردو في المدونة عن تكنولوجيا الاتصالات عموما واتصالات المحمول خصوصا وازاي بتحصل وازاي بتقدر تتكلم والفرق بين الجيل الاول والتاني والتالت والحاجات دي وعن بعض المشكلات اللي بتظهر وانت بتتكلم ع الموبيل والفرق بين المكالمة العادية ومكالمة الفيديو وكده يعني

ثالثا...هستقبل من اصدقائى الاعزاء قراء المدونة اي اقتراحات بخصوص حاجة مش بتحبها في فودافون او خدمة شايف انها المفروض تكون موجودة ..والافكار دي انا هوصلها فعلا من خلال قنوات معينة جوا الشركة ومجرد مااستلم الرد هاقول عليه علطول ...كمان هاحاول قدر الامكان ارد على اي اسئلة بخصوص هندسة الاتصالات عموما – بيقولوا عليا مهندس شاطر بس اكيد مش بعرف لسه حاجات كتير واكيد هاستفيد من اي سؤال هتسأله وابحث عن اجابته

كلمة اخير احب اقولها...المدونة دي ليست اعلان...انا بتكلم عن فودافون ككيان وكشركة اثرت في اخلاقيات وسلوكيات كتير في حياتي ..ورغم كده ممكن اتكلم عن عروض جديدة من وجهة نظري الشخصية او اوضح خدمة جديدة ممكن ماتكونش واضحة او محدش يعرف عنها حاجة

اتمنى ان المدونة دي تكون خفيفة وظريفة..اتمنى اني اقدر اوصل بيها معلومة مفيدة...الامور مش واضحة اوي بالنسبة ليا في الاول..انا ابتديت وهانتظر مشاركتكوا عشان اقدر اكمل
تحياتي
محمد سمير

43 comments:

ايوية said...

مبروك وانا فى انتظار مواضيعك الجميلة كالعادة
وانا فودافون

Desert cat said...

على فكرة انا كمان فودافون
من سنة 2000
وتليفونى كان يتسرق كذا مرة
ويقنعونى اغير الخط لاى شركة تانية
بس والله مش عارفه ايه الانتماء اللى عندى ده لفودافون
وكذا مرة اغير رقمى بس برضه فودافون
وفى وقتنا الحالى كل الناس 016 او 018
او المعظم
الا انا
010
فوادفونى على طووووووووول
الف مبروك يا باشا على المدونة

Bella said...

الوووووووووو

ياتري فيه عروض جديدة
هههههههههه

طيب رصيدنا مش ح يزيد شوية كده

ههههههههه

حلوة قوي الفكرة

منتظرين الموضوعات الحلوة وكلمنا ع الفودافون

My Hope$ said...

فكرة تحفة يابشمهندس
بص بقي
انا عايزة الشركة تبعتلي خمسة جنية كل يوم
يا اما كل ما يلاقو الرصيد بتاعي خلص يظبطوني برصيد جديد
لالالا بص
انا عايزة اتحاسب بالثانية من غير اشتراك ولا يسحبو من رصيدي ولا ادفع اشتراك ثانوي
وعلي فكرة انا فودافون من 6سنين
بس غيرت رقمي لفودافون بردة
بس الشبكة في اودتي مش حلوة خليهم يزودها شوية
هههههههههه
شوفت امارة اكتر من كدا
اصل اخيرا تلاقي نفسك تعرف حد في فودافون ومننا وعلينا
اهو لواحد بيحلم شوية
يلا سلاممممم
مني

ما علينا said...

الف مبروك يا محمد

بصراحة الفكرة حلوة جدا
انا معجبة بيها جدا جدابجد والله

جميل انك تربط بين شغلك وتدوينك
خاصة واني متوقعه
ان شاء الله هانعرف ونفهم حاجات
ممكن نكون مش فاهمينها كويس

بس عارف
انت قلبت على المواجع
مجرد ما قريت عنوان البوست
في غمض عينيك

قلت هو محمد بغيظني ولا ايه

اصل انا كمان كنت فودافون
كان معايا شريحة 010
من ايام ما كانت كليك

وهي دي اللي اتسرقت مع الشنطة
اللي اتسرقت
هاتقولي كنتي سحبتها تاني
ناس قالولي لازم بالبطاقة
وانا بصراحة الى الان مكسلة اطلع بطاقة

فجبت موبينيل
وجبت اتصالات
لكن مفتقدة فودافون جدا
ما جبتش فودافون جديد ليه طالما اشتريت

لان شبكته وحشة جدا عندنا وموبينيل افضل

بس انا فعلا كنت مرتبطة اوي بشريحة فودافون

صحيح قولي
هو انا ممكن ااروح اسحبها في اي وقت
ولا لو عدت فترة معينة يبقى خلاص

ايه دا
كل دا رغي
يا خبر

شفت مش باقولك قلبت على المواجع
ما انا راضية بـ012 و 011 اللي معايا
عارف انا جبت 012 بـ120جنيه
قال علشان مبقاش في لا 012ولا 010

انا بقى منتظرة بوستات
فودافون


سلام يا فودافون

معلش بقى رغيت كتير

كل سنة وانت طيب

rack-yourminds said...

المدونه هتبقي هايله يا باشا

دايما بتمتعنا بموضوعاتك

كل سنه وانت طيب

Lasto-adri *Blue* said...

لول.. شريحتى لسا مكتوب عليها
click
من ايام ما الشريحة كانت بتشيل بس 10 رسايل وخلاص
والله لسا النهاردة فكرت انزل اغير الشريحة عشان اكبر حجم الرسايل المخزنة

بس فعلا على فكرة.. انا ادربت فى فودافون.. وعجبتنى من جوة جدا... وجو الالفة بين الموظفين.. وحتى انشطتها الخيرية..


بس مشكلتها صراحة فى الواسطة فى التعيين يعنى
ودا عن مواقف قريبة منى جدا... الواسطة واكلة كل حاجة جميلة جوة

غمض عينيك said...

---ايوية---

الله يبارك فيكي يا ايوية

اول كومينت في المدونة الجديدة


---قطة الصحراء---

نانا

منوراني يا ناني

وكمان مبسوط اوي انك 010

مش بالذمة مش احلى كتير

: )

---بيلا----

الووووووو

ازيك يابيلااا

سامعاني؟

ياباشا رصيدك هيزيد والعروض هتبقى على ودنه

استنينا انتي بس شوية


نورتيني



---my hope‏---

منوراني يا منى

لا لا خمسه جنيه بس

ايه رأيك في كارت بميه كل طلعة شمي

انتي تأمري بس يا منى

هو في عملاء طيبين زيك كده


تصدقى بالله الشبكة عندي انا كمان وحشه في اوضتي

ولما اشتكيت حصل موقف ظريف هبقى احكيه بعدين


نورتيني



---ما علينا---


كده يا ماعلينا

تطلعي موبينيل واتصالات الاتنين

وفودافون لأ

بس قوليلي شبكته وحشه عندك في البيت ولا في المنطقة كلهااا

اصلها ساعات بتفرق


انا بدأت المدونة دي ومش عارف هكملها ازاي يمكن في دماغي شوية مواضيع بس هاعتمد بعد كده على الكومينتات اني افتح في مواضيع جديدة

اتمنى انها تعجبكوا


بالنسبة لللشريحة بتاعتك

لو فات عليها 3 شهور يبقى خلاص

مافيش امل


نورتيني يا ماعلينا اوي

بجد سعيد بزيارتك



---واحد باشا---


ربنا يخليك يا باشا يارب تنول رضاكوا


نورتني يا كبير

كعادتك دائما


---Lasto Adri‏---

ياااااه كل ده ومستحمل وماغيرتش للجديد

دا كلام ياراجل


احلى حاجة هو جو الالفة اللي في الشركة دا

والانشطة الخيرية بتاعت فودافون يمكن هي اول حاجة خلتني اعمل المدونة دي عشان الناس تعرف حاجة مش باينه ليهم اوي


بالنسبة للواسطة

كل مكان بقى فيه واسطة دلوقتى لكن الصراحة والحق وبدون تحيز نسبة الواسطة في فودافون قليلة اوي

وعشان اكون صادق اكتر

في القسم الفني والهندسي ع الاقل

في الاقسام التانية زي التسويق والحسابات والكلام ده

الله اعلم بس لو فيه هتكون نسبته قليلة جدا بالمقارنة بشركات تانيه


نورتني ياباشا

واتمنى اشوفك دايما


تحياتي لكم جميعا


محمد سمير

ياسمين said...

رغم انى موبينيل الا انى احترمتك جدا لما شفت المدونة

لأنى أحترم جدا الإنتماء
انت موظف فى شركة استطاعت ان تشعرك بالإنتماء

تحياتى لك ولشركتك

lamada said...

انا بقى موبينيل
والواد لمض اخويا فودافون
وبنستنى عروض كل شركه عشان نغيظ فى بعض
بس الحقيقه شركة فودافون شركه تستحق التقدير
انا بقى عندى ليك حته هديه
مكالمه تليفونيه من عميل فى شركه فودافون
بس مش عارفه ابعتهالك ازاى
اوعى تطلع انت اللى كنت بترد على العميل
كده ضمنت انك هتبقى عميل دائم فى عيادتى لو شغال فى خدمه العملاء بالمنظر ده
مستنيه ردك تقولى ابعتهولك ازاى لو فى وسيله انزلهولك
اه الاعلان الاخير جامد قوى الله يسهلكوا ياعم
;)

غمض عينيك said...

---ياسمين---

ربنا يخليكي يا ياسمين
بس عارفة والله انا بحب الشركة دي من قبل حتى ما افكر اني اشتغل فيها
دايما كنت بحس انها بتحترم عملائها اكتر من الشركات التانيه

نورتيني يا ياسمين

---لماضة---

من غير لماضة يا لماضة
عارفها المكالمة دي
وحافظها
الراجل بتاع خدمة العملاء اترقى فيها بعد المكالمة دي
جت في مصلحته
المهم انتي مقولتليش رأيك ايه في المدونة
وبعدين دا لمض طلع دماغه عاليه اهوه وشكله هو اللي بيغظيك علطول

يلا تعيشي وتاخدي يرها بق
مانتي طول مانتي موبينيل هتاخدي غيرها
يلا صباح اللماضة
نورتيني


سلام
محمد سمير

Rania said...

صوباح الخير
مبروك على المدونه الجديدة
فكرة جديدة و منكرش انها حلوة بجد
كل سنه و انت طيب
بس كدة انت بقيت منت الاعداء يا محمد و دة عار لا يمحوة الا الدم
:((
تحياتى
على فكرة انا معايا خطين موبينيل و فودافون:))

MOSTAFA said...

مبروك يا هاني علي المدونه الجديده
وياريت تنجح زي الي قبلها
وعقبال لما يبقي عندك 100 مدونه الكل بيتابعها
وانا الحمد لله انا واختي فودافون
بس انت بقه حاول تقنع ابويا وامي يحولوا فودافون
لان زي مانت قولت اخر مره
البني ادم بيتولد بالفطره
1-مسلم
2-اهلاوي
3-فودافوني

بس انا كمان ما بحبش فودافون في عروضها
عروضها مش قد كده
وكروت الشحن برضه لسه غاليه
علي العموم مبروك

البنت الشقيه said...

ميرسى اوى يا محمد على المدونه دى وانا بجد مش فاهمه العرض الجديد الى نزل بتاع خمسه ده عالفكره انا فودافون يا ريت تقولى عليه مستنيا ردك

bocycat said...

ازيك يا محمد .. فكرة المدزنة دى لذيذة اوى .. وكويس انت مش غريب انا كمان فودافون وكمان مشتركة فى خدمة اللايف وكان فى حاجة نفى اعرفها كنت عايزة ادخل عالاميلات من الموبايل وابعتها كمان بس مش عارفة ده ممكن وللا لأ بس الخط مش بيزنس ده كارت ياريت تفيدنى ياللة بقى استغلال .. تحياتى

مواطن زهقان said...

احنا فى الانتظار يامحمد
عاوزين نشوف العروض
وخاصة
انا فودافون

lamada said...

ماشى يا عم محمد يا فودافونى
المدونه حلوه بجد
احلى حاجه فيها انك قدمت مثل جميل انا شخصيا بحلم بيه ونفسى اكون زيه فى شغلى ان شاء الله
وهو انتماء الموظف لشغله وحبه وتقديره لعمله وكمان اعتزازه بيه رغم مشاكله
يلا يا عم بؤين حلوين اهم
ندخل بقى على اللماضه
بما انك عامل افتتاح للمدونه يبقى لازم توزع شربات
والشربات يتمثل فى خطوط فودافون مجانيه برصيد يكفى لمدة سنه مع ايقاف التنفيذ و1000 رساله مجانى
وكمان عرض خاص للدكاتره الغلابه اللى زى حلاتى مع كل مكالمه ربع جنيه تبرع لصالح غلابه كليه الطب
ده غير خط ذهبى لطالب الطب اللى هيخلص ( اللى هو زيى يعنى كلها كام شهر ) كمان ايه تانى يا لماضه
لما افتكر عروض جديد ه من فودافون هقولك
يلا كفايه دول احنا مش طماعين

Doba said...

مش عارفة ليه بس يمكن برده من الانتماء لكن انا برده بشعر ان فودافون شركة تستحق الاحترام حتى فى الاعلانات تلاقيهم بيجيبو المفيد وخلاص

والشبكة بتاعتهم وخدماتهم ارقى واحسن
يلا حصل خير بقى

مبروك عليك المدونة ومن جديد لتألق دائم بإذن الله

تحياتى
هبة

Nani said...

السلام عليكم
انا لما بروح اي حتة بفضل تكون فودا فون اكمنها عالمية
بس الحلو في الموضوع انك هتعلمنا حاجات كتير عن قطاع الاتصالات
انا بستنى المعلومات على نار
:)

عصفور بلا أجنحة said...

انا فودافون من 1999 شفت باة سبقتك
فكرة حلوة مبرك على المدونة الجديدة
انت مطنشنى ولا اية حاتيط صور جديدة فى نظرة عين

عصفور بلا أجنحة said...

عندى اغنية حلوة اوى لفودافون لو عايز طحتها اولى انا اون لاين حالا

غمض عينيك said...

---‏رانيا---

اعداء مين بس يا رانيا

الاختلاف في الخط لايفسد للود قضية


اهلا بيكي في المدونة الجديدة

انتي نورتيني

حتى لو كنتي موبينيل بس ياستي


---مصطفى---
ربنا يخليك ياباشا
وتفضل دايما فودافون
بس ياعم فودافون عروضها حلوة بس يمكن مش كل الناس تعرفها
وبعدين كروت الشحن وادت 15% على كل الكروت بنفس السعر يعني عمليا الكروت رخصت
بس مش ناس كتير بتاخد بالها


---البنت الشقية---
منوراني يالينا
عينيا هاقولك بالظبط موضوع اهم خمسة ده
بس البوست الجاي
خليكي معايا
نورتيني

---بوسي كات---


اهلا بيكي يا بوسي

نورتيني والله ...وبعدين انتي منوره فودافون كلها

بالنوسبة لموضوع الايميلات هارد عليكي في القريب العاجل

البوست الجاي

ايوه كده شغلوني يا جماعة

نورتيني


---مواطن زهقان---

ياباشا اهلا وسهلا

انت تنورني وتشرفني بانتظارك

بس يارب اطلع عند حسن الظن بيا

نورتني



---لماضة---

لا لا لا

الكلام الجامد دا انا مقدرش عليه

لماضة بتشكر في المدونة وفيا يا جدعوان

دا كده انا اتفتحتلى طاجت الجدر يابا الحاج

وولاد الدهاشنة كلاتهم هيجوا يباركولي على مباركة لماضة

ومش هينفع الشربات

لازمن وحتما ولابد ندبح الدبيحة

خلاص ياخوانا انا هنزل لكل زوار المدونة

خط بسبس مفتوح ايزي كنترول سوبرد درشه كمان

يعني كل الانظمة مضروبة في الخلاط

وده بمناسبة افتتاح المدونة

والعاقبه عندكم في المدونات

وسمعني سلام كلمنى ع الفودافون

واللي يحبنا مايرنش ويقفل


ربنا يخليكي يالماضة كان عندي شد عضلي في صباع رجلي الصغير

تعرفيش نعمله ايه دا


---دوباااا---


دوبا واول زيارة

ول قلنا دوبا يعني هبه

يعني المدونين المحترمين

يعني اهلا وسهلا ونورتينا


من زمان والله وانا بقول كده ياهبه

دايما كنت حاسس ان فودافون ليها رونق مختلف عن موبينيل

الكلام دا فعلا من قبل ماكون شغال فيها

نورتيني

واتمنى اشوفك دايما


---ناني---

فين ماتروح

كلمنى ع الفودافون


ناني منوراني وان شاء الله اقدر اقدم معلومة مفيدة


---عصفور بلا اجنحة----

انتى على طول سابقاني يا عصفور

ربنا يخليكي ع المجاملة

وانا مش اقدر اطنشك ولا حاجة والله

انا هجيلك على طول


بالنسبة للاغنية ابعتيهالي على

Msamir.eg@gmail.com

Thanks in advance

---

---
تحياتي
محمد سمير

حسام مراد said...

الف مبروك ع المدونه الجديده ياباشا
على كده انت بقه هاتفتح خدمه عملاء هنا
ههههههههه
طب كويس والله عشان لما احب اعرف حاجه اقولك هنا على طول

وتصدق بالله
انا فودافون ومن غير زعل فكرت كتير ان اغير بس معرفتش
ماتعرفش ليه بجد
عشان ببساطه
انا فودافون

يلا مستنين بقه المواضيع الجامده
ياباشا
تقبل ارق تحياتى
شغال

غمض عينيك said...

حسام مراد

بس كده
انت كده فهمت قصدي
انت معرفتش تغير خطك
بكل بساطة
عشان انت فودافون
هو دا اللي انا قصدته

نورتني ياباشا
وان شاء الله اقدر اعمل حاجة كويسة في المدونة

تحياتي ليك
محمد سمير

lamada said...

عميلنا العزيز الف سلامه على صوباعك الصغير ونعلمكم بسرعه سداد الفاتوره والا سنضطر لبتر الاصبع
او دفع الفيزيته بكارت شحن مدفوع مقدما كلا على حسب احتياجاتكم
كارت شحن فودافون فئه 5جنيهات لظوفر سيادتكم يمنحك جنيهان فزيته واعادة كشف فى نفس اليوم بعد صلاة التراويح
كارت شحن فودافون فئة 10 جنيهات لعقلة صوباع سيادتكم يمنحكم4 جنيهات ويوم سماح زائد اعادة كشف فى خلال يومين
كارت شحن فودافون فئة 15 جنيه لصوبع سيادتكم الصغير يمنحك 6 جنيهات زائد 5 ايام سماح زائد زياره الطبيب فى نهاية الاسبوع بس الجمعه اجازه
كارت شحن فودافون فئة 20 جنيه لرجل سيادتكم يمنحك 8 جنيهات زائد كيس قطن وشاش
اما اذا كنت مضطرا ومحتاج كشف مستعجل فنظام سوبر دردشه يوفر لك اقل سعر للفزيته وعدد زيارات اكتر للدكتور
شكرا لاستخدماك خدمة دكتورفون
وكلمنى على الفودافون

Samo said...

واضح كده ان انا اخر واحد رد
بس سامحنى على التاخير عشان كان عندى شغل كتير امبارح
والف مبروك بجد على المدونه الجديده
والفكره الرائعه دى

rainbow said...

مبروك مدونتك الجديده لفت انتباهى جمله انا فودافون اصلى انا فودافون من اول ما اشتريت موبايل !! ويا رب تقدر تفيدنا بأى خط هديه او دقايق مجانيه !! لأ اوعى تفتكر انى طماعه ده بس عشم من فودافونيه قديمه الى فودافونى صميم

كل سنه وانت طيب
هدى عبد القادر

3abdo me7tas said...

الا الا الا الا الا
انت بتعمل شغل من ورايا اهو يا ابو سمرة لالالالالا مينفعش كده قولى تعالى واعرفت
اعترف يا ابو سمرة الشركة دفعت لك كام عشان المدونة دى قول والا هط السيخ المحمى فى صرصور البلاعة
قول بما انى درست حشرات بقى ههههه
اولا مبروك يا مان على المدونة الجديدة وانا حاسس اننا هنستفيد منها كتير ان شاء الله
وعلى فكرة انا بحترم شركة فودافون من أيام ما كانت مصر فون على فكرة
بس دلوقتى بقى بما أدا فودافون يا ريت وانت طبعا شغال فى شلاكة فودافون ده اللى فهمته من كلامك يا ريت يا أبو سمرة تحول لأخوك خمسة جنيه كده على الطاير
ولا أقولك دا انت شغال فى الشركة الأم تحولى 50 جنيه يا أبو سمرة كده جدعنه وانا اوعدك انى ههريك رنات بلاش إتصالات بقى
مبروك يا مان على المدونة الجديده
ومتزعلش منى انى مجتش بقالى كتير ظروف والله

بس قولى ايه رأيك فى البوست اللى انا حاطه جامد صح
:D

(green eyes) said...

وانا فودافون

3abdo me7tas said...

نسيت أقول
أنا فودافون
:P

غمض عينيك said...

---لماضة---

ياساتر ع اللماضة
ياستر بتر صوباع حته واحده عشان هنتاخر في دفع الفاتورة
امال لومدفعتهاش خالص هتعملي ايه

وبعدين ايه النصب ده
هاخد بس 40% من قيمة كارت الشحن
لييييييييه
انتي دكتورة ايه يعني
دا انتي حتى ليه دكتورة على ماتفرج
قوليلي
ماتنزلي الفيزيتا شوية وهاظبطك زباين
انا اعرف ناس زمايلي جالهم التهاب مفاصل من كتر مابيقوموش من ع المكاتب
يعني ظبطيني وهظبطك
وهنيالك يافاعل الخير والثواب
وانتي يعني من بيت كرم
وكفر الدهاشنه كلاته بيشكر فيكي ويقول كله الا لماضة
يلا فكري انتي بس وردي عليا


---rainbow---

منوراني ياهدى في اول زيارة
واتمنى دايما انك تكرريها
الله يبارك فيكي
وياستي كفاية زيارتك اللي شرفتني اللي احلى من 100خط فودافون
اتمنى اشوفك دايما


---عبده محتاس---
ابو المحاتيييييييييسسسس
انت فين ياعم
اخيرا نورتنا
لا لا لا انت هتسيح ولا ايه
خلاص ياعم انا هقسم بيني وبينك بالعدل
تاخد انت 5% وانا هاخد الباقي وخلاص

وبعدين يامعلم خمسه جنيه ايه وخمسين ايه اللي انت بتقول عليهم دول
همل دول مقامك بردو
انا هستنى لما يكون ارسال الرصيد بال200 او 300 جنيه وابعتلك علطول

انت تامرياباشا
مش كفايه ممتعنا ومدلعنا ومجندنا معاك في الجيش
نورتني


---green eyes---
تشرفنا بيكي
ونورتيني

--عبده محتاس تاني---
ياباشا انت مشرف فودافون كلها

تحياتي محمد سمير

غمض عينيك said...

---سامو---

نورتني ياباشا
وولا يهمك
ربنا يوفقك في شغلك وحياتك ان شاء الله

محمد سمير

wa7dania said...

محمد
أنا فودافون
و بجد بعتز بيها جدا
حتى لو مش نزلت عروض
أنا عندي استفسارين الحقيقة
هل فعلا تم ترميم مدارس ؟
و لو آه
إيه مدى اهتمامها بمدارس وجه قبلي بعيد عن الواجهة الرئيسية اللي هي القاهرة
ثانيا
أنا اللايف مش شغالة عندي
ليــــــــــــــــــه ؟
:'(

غمض عينيك said...

وحدانية

انا بردو من زمان وانا معتز بخطي الفودافون اوي بحس دايما ان الشركة بتحترم عملائها ولما جيت لقيتها بتحب عملائها

بالنسبة للمدارس والاعكال الخيرية انا هحكي عليها في بوستات منفصلة بس اقدر اقولك ايوه مدارس كتير اترممت واتجددت وفي المناطق النائية

بالنسبة للايف
انا مش عارف المشكلة عندك بالظبط ايه

لو تليفونك من الماركات المتداولة والعادية المفروض مايكونش في مشكلة...مجرد بس امسحى الكونفجيوريشن اللي عندك و اتصلي ب *444# ودخلي 4444 وهو هيعمل كونفجيوريشن تانية جديدية
لو مش كده كلمي خدمة العملاء وقوليلهم نوع تليفونك

لو عملتي كل ده ومحتاسه..اديني تفاصيل وانا هظبطلك المسائل من عندي

نورتيني يامنى

wa7dania said...

محمد أنا عملت كل اللي إنت قلت عليه
وأخدت إسبوع كامل بتصل بخدمة العملاء يوميا
و والله عملوا معايا كتير بس الخدمة مش اشتغلت برده
واضطريت أشتري خط اتصالات واشتغلت الخدمة على موبايلي
يعني موبايلي مش فيه عيب
واشتكيتلهم وقلتلهم مايرضيكمش إني أشتري خظ اتصالات..والخط مرمي أنا مش مستفيدة بيه طبعا عشان اللايف غالي و بطيء فيه
عامة
أنا هحاول أتواصل معاك أكتر عشان الموضوع ده بجد تعبلي أعصابي
أشكرك جدا على اهتمامك و ردك
منى

إيمان الميهي said...

أنا كمان فودافون من ست سنين
شكرا ليك يا أستاذ محمد
فكرة المدونة لطيفة و مفيدة ف الوقت نفسه
فودافون شبكة قوية بس ف الفترة الأخيرة من شهرين مثلا بدأت الاتصالات تحصل فيها مشاكل صغيرة كده مكنتش بتحصل قبل كده زي صعوبة الاتصال يا ترى أيه السبب ؟
بالمناسبة بقى اسأل حضرتك على سؤالين مهمين :
الأول : هل لسة فيه أرقام مميزة 010 أو 0100 ؟ و هل بالسعر نفسه ولا سعرها أغلى ؟ و هل موجودة ف أي منفذ بيع خطوط ؟؟
الثاني : موضوع الخمس أفراد ب 5 ج ف الشهر مكالمات أو 60 رسالة هل ده معناه إنه لما انا اكلم الناس دي هكلمهم أرخص ولا لما هما يكلموني ولا لما هما يتكلموا عموما مش شرط ليا ؟ و هل لازم خمسة ؟
شكرا جدا لحضرتك
و جزاك الله خيرا

Anonymous said...

فكره روعه يا مهندس

انا بردو فودافون من ايام الخط ابو 800 جنيه

من سنه 2000 وبعتز جدا بالشريحه دى

ليه استفسار وارجو الرد

انا عايز اتاجر فى كروت الشحن صحيح راس المال مقصر شويه لا ده مش شويه دا مقصر اوووووووووى بس عايز حضرتك تقولى البكته فئه 10 جنيه بتطلع بكام من الشركه لانى بجد عايز اجرب فى الموضوع ده وبتتباع بكام للمحلات

وكل سنه وانتو طيبييييييييييين

احمد سمير

sawah643@yahoo.com

غمض عينيك said...

ايمان الميهي-----

اعتذر عن التأخير في الرد
بالنسبة لموضوع الارقام المميزة
اعتقد ان ال 010 بقا قليل اوي في السوق ولو لاقتيه هتلاقيه غالي شوية
بس في ارقام مميزة كتير في ال 016

بالنسبة لاهم خمسة فلو كلمتي خدمة العملاء هيكون شرحهم افضل لان زي ما انتي شايفة لما جيت انا اشرحها لخبطت الدنيا والناس اللي كانت فاهماها رجعت تاني مش فاهمة منها حاجة
نورتيني


---احمد سمير---
ربنا يخليك ياباشا ع المجاملة
والله بالنسبة لموضوع كروت الشحن دا انا ماعرفش فيه حاجة خالص ولا اعرف بيتتاجر فيه اواي

ربنا يعينك ان شاء الله ويوفقك
نصيحة شخصية اسأل حد من التجار والموزعين وهو اكيد هيفيدك

اسف بس انا بعيد خالص عن القسم التجاري

نورتني

محمد سمير

Anonymous said...

لا مهو كده مينفعش يا محمد بيه سمير دا احنا اخوات ياراجل ياريت تشوفلى الموضوع بتاع الكروت ده من داخل الشركه لان انا عايز افتح (موزع كروت فودافون جمله وتجزئه)

اتصرف يا عمنا اخوك محتار ومش عارف انفذ الموضوع ده لوحدى اتمنى مد يد العون ليه


اتصرفوووووووووووووووووووووووووووو

وشكرا يا باشا على ردك واهتمامك

moora_666 said...

السلام عليكم يا جماعه وكل سنه وكل مصر بخير بجد انا اول مره ادخل الموقع ده بس بجد فرحت اني لقيت الشباب بتتكلم في مواضيع جميله وبيناقشو حاجات في حياتنا فعلا

moora_666 said...

سوري يا جماعه انا مش في مصر انا في الكويت وبجد نفسي اشغل الخط بتاعي تاني لانه مقفول من حوالي سنه ونصف يا تري هينفع اشغله تاني واتمني بجد حد جدع يساعدني

moora_666 said...

انا بحييك بجد علي المواضيع الجامده ديه وربنا يوفقك وبجد الموضوع هايل وما شاا الله اسلوبك جامد جدااااااااااا

FARESSALLAM said...

طيب ممكن حد يقدر يوصلنى للشركة علشان عايز اشترى كمية 1500 مودم
ممكن حد يقولى اعمل ايه واوصلهم ازاى ؟؟؟ يا ريت يعنى ويبقى ليكو الشكر