THE END

With All my Love to Vodafone

Please go to...

http://www.facebook.com/Vodafone.Egypt

ماتفوتش لحظة

كنت قد قررت منذ فترة اغلاق المدونة بشكل مؤقت ولم استبعد اغلاقها بشكل نهائى...وذكرت اني في حالة الاغلاق النهائي سأوضح الاسباب ولكن ومع اعادة نشاط المدونة رأيت من الضروري ابداء الاسباب التي قادتني الى القرار السابق والاسباب الاخري التى دعتني الي العودة فيه
الرغبة في اغلاق المدونة بشكل مؤقت كانت رغبة ملحة رغم عمر المدونة القصير وكان السبب الاساسي هو الانشغال...فقد ابتديت المدونة بحماس شديد وانتويت ان اجعلها مميزة وبشدة وبرغبة متقدة ولدها حبي لفودافون وولائي الشديد لافكار الشركة ولثقافة العمل فيها وبالاخص وضع العميل في بؤرة الاهتمام وامتد الحماس الى ما تعدى الفضاء التدويني من حيث جمع المعلومات وترقب الاحداث الخاصة بالشركة من انشطة وحملات اعلانية وعروض جديدة رغم بعدي – وانا الموظف بالشركة- عن هذة الحملات الاعلانية والعروض الجديدة وعدم معرفتي بها الا من خلال العملاء العاديين وربما مكالمة الى زملائي في خدمة العملاء لشرح العرض الجديد..كل ذلك بالاضافة الي الرد على التعليقات وماتحتويه من استفسارات واسئلة واحيانا هجوم
وكنت لازلت مصرا على ابقاء اليد العليا لمدونتي الاولى "غمض عينيك" فهي بابي الى عالم التدوين وبداية تلفظي بما تحويه نفسي من افكار وامال واحلام وانطباعات عن هذة الحياة...كل ذلك ادى الي استهلاك جزء كبير للغاية من تفكيري قبل وقتي فاضحت اهتماماتي الاولى منحصرة بين "غمض عينيك" و "انا فودافون"..مما ادى الى التقصير في امور اخري في حياتي او بمعنى ادق اصبحت ابذل مجهود كبير للتركيز في حياتي وايفاء التزاماتي بين التزامات العمل والالتزامات الاجتماعية واصبح النوم ترف لا املك الا جزء يسير منه...فكان لابد من وقفة...وقفة لترتيب الاوراق والاهتمامات..وقفة لحساب النفس ومتابعة الاهداف...كان قراري بغلق المدونة مؤقتا هو الحل الامثل خصوصا مع عدم وضوح استراتيجية معينة للبوستات واعتمادي على التعليقات في كتابة مواضيع جديدة. ومن الممكن ان تلاحظوا هذا الضغط واضح في تدوينات "غمض عينيك" والتي تزامنت مع غلق مدونة "انا فودافون"ء
اما عن سبب التصريح باحتمالية الغلق الدائم فكان له اسبابه التي تراجعت عنها....منذ بداية مدونة "انا فودافون" ورغم مدحي الدائم في فودافون كشركة لم اذكر ابدا انها بلا اخطاء...لم اذكر ابدا ان التغطية او الخدمات المقدمة من الشركة لا تقابل أي مشاكل او انها مستقرة بصورة دائمة..على العكس لقد كنت في غاية الصراحة حين ذكرت بأنه ورغم جميع التدابير وجميع الاجراءات الاحتياطية فان شبكة التغطية تواجه مشكلات وضغط رهيب ايام المناسبات والاعياد...لقد كنت في غاية الصراحة والوضوح حين ذكرت ان المقارنة خير برهان وان القيمة المطلقة لقياس الحدث هو ظلم ولكن القياس النسبي هو ماتتضح به الصورة
ورغم كل ماسبق استقبلت تعليقات كثيرة بين متهكم وساخر ومهاجم بشراسة واحيانا كنت استقبل الفاظ وسباب اثرت ان لا انشره....ذلك دعاني الي التفكير بغلق المدونة بشكل نهائي..انا مهندس...تعايشت مع اجهزة الشبكة وخبرتها وخبرت مشاكلها وكان دائما اسهل لي ان اسهر طوال الليل وسط الاجهزة ورغم برودة اماكنها..كان ذلك اسهل لي من مكالمة عميل لاستيضاح شكوى او مشكلة وكنت الجأ الى زملائي في خدمة العملاء للقيام بهذة المهمة نيابة عني فهم اكثر تدريبا وصبرا وفنا في التعامل مع العملاء باختلاف طبقاتهم وانواعهم....والدليل على ذلك مكالمة خدمة العملاء الشهيرة والمنتشرة على اجهزة الموبايل وهي حقيقية بالمناسبة
كان ذلك بمثابة تحدي بالنسبة لي فانا كنت اعلم اني لن ارضى جميع الاطراف..هذة هي الحياة..ولولا اختلاف الاذواق لبارت السلع..كنت متوقع الهجوم لكني لم اتوقع التهكمات والسخرية والسباب......سيدي الفاضل هل تعلم مدى المجهود الرهيب المبذول لخدمة اكثر من 12 مليون عميل حتى وان كان مليون عميل يعانون من المشاكل.....هل تعلم مدى دقة الاجهزة التي تقدم خدمات الفيديو والمكالمات الصوتية والصور...هل تعلم مدى التعقيد الشديد جدا في خدمة جديدة زي اهم خمسة
هو مجهود يستحق الاحترام والتقدير حتى وان اختلفنا معه.....وانا احب ان يقدر الاشخاص من يستحقون التقدير وان قصروا وان اختلفوا معهم....عندما تقدم خدمة لملايين من الناس فأنت تبذل مجهود واضح ويجب ان يتم تقديره لا ان يتم التهكم عليه والسخرية منه
بالرغم من كل شىء قررت اعادة فتح المدونة..اعلم اني لن انال رضاء جميع القراء ولكني اتمنى ان انال الاحترام وان تنال فودافون متمثلة في جميع موظفيها التقدير الذي يتناسب مع مجهود كبير يتم بذلة لراحة العملاء حتى وان واجه هذا المجهود بعض المشكلات
هناك سبب اخر كان له ابلغ الاثر في الغاء قرار غلق المدونة ولكني لن افصح عنه الان بل قريبا...للغاية
تحياتي لكم جميعا
وانتنظروا المزيد من التدوينات
محمد سمير

عدنا

كل عام وانتم بخير وسعادة

في بداية العام الجديد اهنئكم

واعلن اعادة افتتاح مدونة

انا فودافون

ابقوا معنا

المدونة مغلقة

المدونة مغلقة مؤقتا

او

ربما للأبد

وان كان

سأوضح الاسباب لاحقا

تحياتي

فودافون والعمل الخيري

كنت –ولازلت- مؤمن دايما ان فودافون شركة بجد محترمة وبتحترم عملائها الى اقصى الحدود ولما التحقت بيها بتوفيق من ربنا سبحانه وتعالي عرفت حاجات تانية زادت من احترامي للشركة من ناحية وزادت من غيظي من اسلوب

الدعاية اللي بيحرم ناس كتير من انها تكون عارفة الشركة دي تبقى ايه بالظبط
تباعا لتعليقي على اسلوب الاعلانات والدعاية اللي في اغلب الاوقات مش بيوصل المعنى بالكامل ..كان ليا تعليق بردو على عدم الاشارة بالشكل الكافي لانشطة الشركة الخيرية ومساهمتها في تطوير جوانب كتير من مجتماعنا بدون مايكون

ليها أي عائد في اوقات كتير زي حملات التشجير مثلا اللي محدش يعرف عنها حاجة واللي فودافون مش هتجني من وراها حاجة
أيا كان..كان في حديث حصل بيني وبين مجموعة من اصحابي وكنت باعرض وجهة نظري دي وبقول قد ايه انا مضايق ان الشركة مابتعلنش بالشكل الكافي عن انشطتها..واذا باحد اصدقائي يرد ويقولي " ماهو لازم ماتقولش عشان مايضيعيش عليها الثواب"...اجابة كانت غريبة جدا جدا مع احترامي لقائلها...ثواب ايه اللي الشركة عايزاه..دا بيزنس...شغل وفلوس ومصالح.؟؟؟الله طب مانت لسه قايل من شوية ان انشطة كتير مابيكونش ليها عائد ع الشركة امال فلوس ومصالح ايه؟؟؟؟
الاجابة هي في السطر التالي

Corporate Social Responsibility

المسؤولية الاجتماعية للشركة....ودا قسم موجود في الشركة..الناس اللي فيه شغلتها انها تراقب الانشطة الاجتماعية في المجتمع حوالينا وتقرر ازاي الشركة تساعد في تطوير الانشطة دي وايه الاجراءات اللي ممكن تتاخد ان كان عن طريق التبرع او التطوع او المشاركة ...ونيجي هنا لنقطة مهمة.....الشركة بتعمل كده ليه؟ ايه العائد الحقيقي عليها؟؟

اولا- الشركة ككيان ناجح في المجتمع لازم يكون ايجيابي ويتفاعل مع مشاكل المجتمع اللي موجود فيه ويساهم في حلها..ودا مش كلام انشاء لا دا حقيقي وموجود ومحسوس جدا وهتكلم عنه بالتفصيل في بوستات تانيه كتير اوضح فيها فعلا ان فودافون مش مجرد شركة بتشتغل وتكسب وبس..لأ..دا كيان مسؤول في المجتمع ومشارك رئيسي فيه
ثانيا- دي سمعة كويسة للشركة عشان الناس تحس وهي بتدفع فلوسها ان الفلوس دي جزء منها فعلا بيروح في عمل الخير وتطوير المجتمع حتى وان كان العمل ده مالوش تأثير مباشر عليهم
ثالثا:- هي اعلانات غير مباشرة بتقولك بالظبط شركتك بتعمل ايه وزي مابتقدملك الخدمة هي بردو عايشه معاك

طب حاجة كمان...امال ثواب زيارة الايتام ودور المسنين والحملات الطبية والحاجات دي بتروح لمين...لعم فودافون الكبير؟؟ لأ طبعا..الشركة لما بتقوم بأي نشاط بتطلب متطوعين من الموظفين في كل مرة 10 او 30 او 40 على حسب النشاط..وهما دول بقا اللي بياخدوا ثواب الخير وهما دول اللي المفروض يعملوا زي ماصاحبي قال " مايعلنوش عن اللي هما بيعملوه عشان مايضيعوش الثواب"ء

دي كانت مقدمة بسيطة عشان اقول ليه بيكون في نشاط خيري في مؤسسه او شركة هدفها الاول طبعا هو النجاح والربح وان شاء الله تباعا هاتكلم عن الانشطة دي بالتفصيل

ليلة العيد

كل سنة وانتوا طيبين ياجماعة...رمضان خلص والعيد عدى وبعودة الايام

حبيت يكون اول بوست ليا بعد العيد هو ذكرياتي عن ليلة العيد مع فودافون وما ادراك ما ليلة العيد
على مدار السنة بيكون في مناسبات واعياد معروفة زي عيد الفطر وعيد الاضحى وشم النسيم وليلة رأس السنة

وغيرها دا طبعا بالاضافة لماتشات الاهلي والزمالك والبطولات الدولية المقامة في مصر واي حدث تاني تقرر الناس في بلدنا انه مهم حتى ولو كان عيد ميلاد...المناسبات دي كلها بتكون معمول بيها اجندة معينة ومحددة التواريخ والاجراءات ومجرد ماتعلن الاجندة اقتراب يوم العيد بيتحول قسم التكنولوجيا في الشركة الي ثكنة عسكرية..ترفع الرايات وتدق الابواق وتبدأ الاجراءات.. بيتم رفع كفاءة الشبكة بشكل خاص باوقات الذروة وبيتم تدعيم الوصلات الخاصة بها واللي بتربطها بباقي الشبكات وبتتاخد اجراءات تانية كتير مش هاعرف اتكلم عنها لكن هدفها كله بيكون

رفع كفاء الشبكة وتزويدها بالقدرة اللي تخليها تصمد قدام طوفان المكالمات والرسايل في العيد

ومجرد ماتتحدد ليلة العيد تتحول غرفة مراقبة الشبكة الي مركز قيادة عسكرية حيث الشاشة الكبيرة تتوسطها خريطة جمهورية مصر العربية موزع عليها اماكن التغطية وبرامج خاصة (مبدعها مصرييون) لمراقبة عمل الاجهزة

ومؤشرات الحمل وزيادة المكالمات في اتجاه معين (يعني من القاهرة لاسكندرية مثلا او من الدقي لمصر الجديدة)ء

بالاضافة طبعا لمراقبة الاجهزة الخاصة بالرسائل القصيرة ومحطات التقوية... وامام الشاشة تتناثر اجهزة الكمبيوتر يجلس عليها مجموعة من المهندسين من كل الخبرات و الفئات والاختصاصات..ههههه..تلاقي بتاع الرسايل مع بتاع المكالمات والفيديو مع بتاع اللايف مع بتاع الشبكات ...كل واحد قاعد مركز في اللي هوه فيه وعينيه على الاجهزة كلها ومستعد لاي كارثة تحصل
بيكون يوم عصيب فعلا وبيبتدي الضرب على المغرب كده وبتتصاعد حده المعركة لتصل لذورتها من العاشرة مساءا

الي منتصف الليل وتبدأ حدتها في الانخفاض حتى تتنتهى مخلفة ورائها بقايا مهندسين على الساعة الثانية صباحا حينها تهدأ الامور.....ليلة العيد بتكون ليلة ليلاء على اللي موجودين في الشركة...انا فاكر السنة اللي فاتت ان انا وزمايلي زودنا سعة الاجهزة 184 مرة خلال 3 ساعات من كتر الضغط ع الشبكة وكان يوم ما يعلم بيه الا الله ورجعت البيت مدمر
وكله كوم...كله كوم...وتاني كله كوم وليلة رأس السنة دي كوم لوحدها..حيث تتحد الامال والامنيات وتتلاقى القلوب مع النظرات ولا يتبقى الا الدعوات وتتحد العيون كلها في اتجاه شاشة المراقبة الضخمة وفي لحظة واحدة عند الساعة الثانية عشرة صباحا حيث يبدأ العام الجديد بصرخة الاجهزة وارتفاع المعدلات في وقت قياسي وبصورة جنونية لدقائق

قليلة يعود بعدها كل شخص الي مكتبه لينقذ مايستطيع انقاذه وليلملم اشلاء الاجهزة التي تطايرت من فرط قوة الضربة...ضربة ملايين المكالمات في نفس اللحظة.دي بقا بتكون ليلة تحكيها لاولادك واحفادك من الاثارة اللي بتكون فيها

طبعا رغم الاجراءات اللي بتتاخد دي بيكون في بعض المشاكل لكن الناس بتكون موجودة عشان تحلها وبتكون ليها الاولوية..لكن في مشاكل تانية بتحصل مش بيكون ليها حل غير الصبر والانتظار ... زي شعورك وانت بتنزل ويندوز جديد على جهازك وفجأة الكهرباء تقطع او الجهاز يعمل ريستارت بدون أي سبب مقنع..بيكون شعورك ايه وقتها؟
كل سنة وانتوا في عيد والخير فيه يزيد ويزيد

العيد رنة

كل عام وانتم بخير
يعني
كل سنة وانتوا طيبين
وللموبايلات شاحنين
وللشبكة لاقطين
وللفاتورة دافعين
وللمكالمات مظبطين
وان شاء الله السنة الجايه
تكونوا كلكوا فودافونيين
واحتفالا بالعيد السعيد
وتظبيط التظابيط
المدونة خارج نطاق الخدمة
والمدون فاصل شحن
وبعد العيد
نحكي ونقول
عن خيمة فودافون الخيرية
وحملات الرعاية الصحية
ونحكي عن الجيل التالت
والتالت ونص كمان
ومعاه الجيل الفائت
ونقول اشهر الشكاوي
وسببها من غير حكاوي
ونرجع لعم فودا الكبير
وبنا المدارس والتشجير
وخيمة الايتام في رمضان
ومسابقة الرسم والالوان
ورعاية الاهلي وبطولاته
ومساعدة التلميذ في حياته
ونرجع للمحمول ورسايله
ورناته وصورة وافلامه
يعني كل عيد
والخير يزيد
وكل سنة
والفودافونيين
والموبينيليين
والاتصالاتيين
طيبيين

كلمنى شكرا

لما ابتدت تكنولوجيا التليفون المحمول في مصر كانت الخدمة غالية اوي في اولها وكان عشات تعمل تليفون لحد هتدفع فلوس كتير وحتى الرسايل كانت خدمة جديدة علينا ومش كل الناس عندها لا الصبر ولا الخلفية اللي تقدر تكتب بيها رسالة على المحمول وتبعتها وهي مطمنة ان الرسالة هتوصل او ان اللي هتوصلة هيفهمها او حتى هيقدر يقراها....وكالعادة وامام التحديات ابتكرت مصر تكنولوجيا الميسدات...اديني رنة....رنلي...ياميسداتك يامعلم...دا حتى بقا في محلات اسمها "ميسد كول"...وبقت لغة بين الناس..رنلي مرة واحدة اكلمك..رنلي مرتين اعرف انك مشغول..رنة طويلة يبقا انت هتنام..وهكذا بقت لغة فعلا وفي نفس الوقت بقت صداع لشركات المحمول واي صداع

انا بس حابب اقول حاجة صغيرة في الاول وهو الفرق بين التليفون الثابت والموبيل...في التليفون الثابت انت في كابل او سلك واصل بينك وبين السنترال..هترفع السماعة هتلاقي حرارة وتضرب الرقم هتقول الو...الكابل واصل بينك وبين السنترال ومن الناحية التانية واصل بين السنترال وبين التليفون التاني ولمكالمة ماشية زي القطر على قضبان لا بتروح يمين ولا شمال وانت في مكانك وهو كمان

انما الموبيل حاجة تانية...انت عشان بس ترن رنة في اكتر من عشرين عملية بتتعمل في الشبكة دا غير الاجهزة اللي الاشارة بتعدي عليها وبتستخدمها...وعلى عكس القطر اللي ماشى على قضبان في التليفون الثابت..مكالمة الموبيل بتكون عاملة زي العربية من غير فرامل في طريق واسع لازم حاجة تتحكم فيها عشان كده بتكون في اشارات لاسلكية تانية مهمتها بس انها تتحكم وتوجة المكالمة..من التليفون للمحطة اللي فوق الاسطح ومن المحطة لنقطة التحكم ومن نقطة التحكم للسنترال الرئيسي غير طبعا الاشارات التانية اللي عن طريقها بنتاكد من ان الرصيد كافي وعن طريقها بندور على مكان الراجل اللي بنتصل بيه واللي بردو بنشوف انت نفسك بتبعد ولا بتقرب عن المحطة عشان لو الاشارة ضعفت تنقل على محطة تانية........الكلام ده كله واكتر بيحصل وانت بتدي رنة...بيكون في حوار بين الموبيل والمحطة اللي لاقط منها الاشارة ( حوار بمعنى الكلمة- يعني سؤال واجابة واستفسار ورد)...الحوار ده بيشغل المحطة في الوقت اللي ممكن تخدم فيه حد تاني او تليفون تاني هيعمل مكالمة..غير ان اشارات التحكم اللي اتكلمت عليها بردو بتستهلك ع الفاضى وانت بترن...انت عارف مجرد ما المكالمة تبتدي..خلاص كل الاشارات دي بتروح لحالها طالما المكالمة ابتدت والناس سمعت بعضيها...كل الاشارات دي بتكون خلصت مهمتها ما عدا الاشارات المسئولة عن التحكم في حركة التليفون عشان المكالمة ماتقطعش وانت بتتحرك.... الاشارات دي هي الصداع بالنسبة لشركات المحمول..انت بتستهلكني بدون ما تستفيد منى ولا تفيدني ...الرنة بتحصل في حوالي 3 او 4 ثواني وده بالنسبة لاشارات المحمول عمر مديد...ممكن تتخيلها لو قلتلك انك عشان تكون لاقط شبكة ع الموبيل...بيكون في حوار بين الموبيل والمحطة (اللي فوق المنازل) 400 مرة في الثانية.....متخيل عشان بس تكون لاقط شبكة وتليفونك معروف

وعشان كده ومع العدد الرهييييييب من الرنات والميسدات اللي الشبكة بتشيلها كان لازم يكون في حل تاني...وقد

كان...كلمني شكرا...3 رسايل في اليوم مجانا وباستخدام كود سهل عشان ماتكتبش حاجة..وبكده اقدر اقلل ولو 30% او 40% من عدد الميسد كول
ميزة الرسايل عن المكالمات...ان الرسالة مش لحظية..يعني ممكن توصل متاخرة ثانية او اتنين او حتى 30 ثانية انما المكالمة لو اتاخرت ثانية واحده الكلام هيدخل في بعضة ومش هتفهم حاجة من اللي بيكلمك. كمان حاجة ان الرسالة بتمشى عن طريق تاني خالص....دي بتتبعت لجهاز معين بيخزن كل الرسايل وبعدين يبدأ يبعتها واحدة واحدة من عنده زي مكتب توزيع البريد بالظبط وبعيد عن الشبكة الرئيسية اللي شايلة المكالمات يعني مش هشغل حاجة في الشبكة

ء"كلمني شكرا "كانت الحل السحري لشركات المحمول عشان تنقذ نفسها من براثن الميسد كوول وتتحكم في معدل استنزاف الشبكة بسبب المكالمات الغير كاملة وكانت بالنسبة للعميل خدمة حلوة بتوصل كلامة مفهوم اكتر ومن غير مايكتب وحتى لو مكانش معاه رصيد
يعني الشركات كسبت والعميل كسب
والناس بقت بدل ماتقول اديني رنة بقت تقول كلمنى شكرا

كروت الشحن

كان ليا دايما تعليق على اعلانات فودافون ع التليفزيون انه بيشوبها بعض الغموض..الخدمة الجديدة او العرض الجديد مش دايما بيكونوا واضحين للناس عن طريق الاعلان..وبالرغم من ان خدمة العملاء بتقوم بشرح العرض الجديد او الخدمة الجديدة بشكل وافي الا ان الاعلان التليفزيوني له انطباع كبير عند العملاء وخصوصا في الجو التنافسي الموجود دلوقتي...لم يسلم من تعليقاتي الا الحملة الاعلانية اللي نزلت مع الجيل التالت واللي فعلا كانت اكتر من ممتازة سواء في الصحافة او في التليفزيون او حتى اللوح الاعلانيه في الطرق والميادين وخصوصا ان الحملة دي جت بعد نزول اتصالات للسوق المصري بصمت غريب مع ان التوقعات كانت كلها بتقول انها هتنزل بضجة كبيرة وحملة اعلانيه ضخمة ودا اللي محصلش
ويمكن انطبعاتي دي كانت من ضمن الاسباب اللي خلتني اعمل المدونة عشان اوصل حاجات واشرح حاجات ربما ماتكونش واضحه للناس عن طريق الاعلانات ورغم اني عارف اني مش هاقدر اوصل الا لنسبة قليلة جدا جدا من الناس الا اني هشعر بالرضا اكتر وهاحس انى عملت اللي عليا

اتصالات اول مانزلت السوق المصري كانت كل عروضها مساوية لعروض فودافون وموبينيل ماعدا نقطتين اتنين بس
اول حاجة كانت السبق في اعلان تقديم خدمات الجيل التالت لاتصالات المحمول ودي كفلتها بنود الرخصة اللي اتصالات كسبتها بالرغم من ان فودافون كانت جاهزة لتقديم الجيل التالت في أي وقت وطبعا موبينيل خارج المنافسه لكونها معندهاش رخصة الجيل التالت اساسا

تاني حاجة كانت رفع لضريبة ال 15% من على كروت الشحن ودا اللي فعلا جذب نظر عملاء كتير للشركة الجديدة وكان لازم يكون في رد من فودافون وموبينيل بخصوص كروت الشحن دي بالذات...خصوصا ان احنا بنتضايق اوي كعملاء من الكام جنيه الزياده على تمن كارت الشحن
وخلال الاسبوع اللي فات نزل اعلان موبينيل " رخصنا كل كروت الشحن" اعلان واضح وصريح ومش محتاج تأويل ولا شرح وابتدت الناس تتكلم...طب وفودافون مش هترخص كروت الشحن هي كمان؟ ويمكن دا ظهر في تعليقين من تعليقات المدونة
ياجماعة فودافون رخصت كروت الشحن من اكتر من شهر فات
بس رخصتها ازاي؟ هو دا السؤال ....فودافون بدل ماتشيل الضريبة من على الكروت زودتها في قيمة الكروت..يعني
انت لما تيجي تشتري كارت شحن 100 جنيه بتدفع 115 جنيه بس بتاخد رصيد 115 جنيه بردو
و لما تيجي تشتري كارت شحن 50 جنيه بتدفع 58 جنيه بس بتاخد رصيد 58 جنيه بردو
وهكذا
يعني الرصيد زاد ع الكروت..يعني عمليا الكروت رخصت بس الاعلان مكانش واضح...دا كمان في موزعيين مش واخدين بالهم لغاية دلوقتي ودي مشكلة كبيرة في حد ذاتها

وخصوصا ان ناس كتير لما بتيجي تشحن مش بتكون عارفة رصيدها فيه كام بالظبط...هو عارف ان رصيده قليل او ان فترة السماح قربت تخلص والمفروض انه يشحن وبعد لما يحن بتجيلوا الرساله الصوتيه تقولوا رصيدك الحالي كذا وقتها بقا الواحد مش هيركز هو كان معاه كام ورصيده زاد كام....يعني ممكن الزياده في قيمة الكارت يفتكرها كانت اصلا موجودة في رصيده وهو ماخدش باله او حتى ممكن يفكر ان الرصيد زاد بالغلط ..انما مش هيفكر ان قيمة الكارت نفسه زادت على اعتبار ان الحداية مش بتحدف كتاكيت
بس ع العموم مع الوقت الناس كلها هاتعرف

تحياتي

ء"كلمني شكرا" خدمة اختلف عليها الناس

لكن

اذا عرف السبب بطل العجب

البوست القادم

انتظروني

ردا على دينا

بعد نشر البوست اللي فات الي كان عنوانه "فودافون" جالي تعليق من الاستاذة دينا صاحبة مدونة دينا وكان التعليق بيقول " لا حقيقي أقوى شبكة في العالم، طيب خش اقرى الموضوع ده علشان تعرف هي أقوى شبكة مخرومة في العالم كله" الحقيقة انا فوجئت بنبرة تهكم شديدة في الكومينت وخصوصا انها اول مرة تشرفني بزيارتها سواء في "انا فودافون" او "غمض عينيك" وفعلا اتركز كل تفكيري اني ادخل اشوف الموضوع اللي هي بتتكلم واللي كنت متخيل من لهجة الكلام انه احصاء رسمي او دراسة علمية او حاجة هتثبت ان فودافون دي اصلا سلسلة مطاعم مش شركة اتصالات محترمة لكني فوجئت بالبوست ده في مدونتها

منذ بضع أيام وخدمة عملاء فودافون خارج الخدمة، وإن حاولت الاتصال بأي من أرقامها فلن تلقى أي استجابة، كما أن فروع الخدمة في أنحاء القاهرة لا تستطيع الاتصال بخدمة العملاء

ومن العجيب أن فودافون مصر تفخر بفريقها البالغ عدده أكثر من ثلاثة آلاف موظف يخدمون أكثر من 4‚9 مليون عميل (إحصاء مارس 2007) في أرجاء مصر. وأن نجاح الشركة كما تزعم في موقعها يعتمد على تفوق شبكتها وتميزها في خدمة عملائها وريادتها في ابتكار منتجات جديدة، كما يعتمد، قبل كل شيء، على استراتيجية نمو محددة الأهداف. كما تقدم فودافون مصر خدمات التجوال من خلال اتفاقيات مع أكثر من 385 شريك في ما يزيد عن 138 دولة

انا اسف يا استاذة دينا...بس الكلام ده مجرد رأي..ملاحظة...وجهة نظر شخصية وان كانت طبعا تستحق الاحترام الا انها قابلة للمناقشة وليست حقيقة ثابتة او نقطة دراسة ارجعلها لما يجول بخاطري خيالات واوهام تستحق التهكم زي اللي كان في اسلوب التعليق

اولا... انا لما اتكلمت عن فودافون ماتكلمتش عن سلعة مجرد كام الف واحد بيستخدمها..لأ انا اتكلمت عن خدمة فيه ملايين بيستخدموها...يعني كلنا عارفين ان فيها عيوب بعض الاحيان وان الشبكة وحشة في بعض الاماكن وان وان وان....لكن هل معنى كده ان كلمة " اقوى شبكة في العالم " مجرد بروباجندا او اعلانات؟؟؟؟
الحقيقة لأ خالص...انا كنت واضح البوست اللي فات لما قلت ان فودافون مش بتحتل بس مركز متقدم على مستوى العالم كمقدم لخدمة المحمول لأ دي كمان بتستمد سمعتها من كونها عضو من الاعضاء المؤسسين للجان ارساء التوصيات لتكنلوجيا المحمول كلها ( معليشي تعريب الكلام الانجليزي رخم شوية) يعني شركات المحمول في العالم كله ماعدا امريكا واليابان بتقدم خدمة الاتصالات المحمولة بناء على توصيات واستاندرد فودافون مشاركة في وضعة...مش شركات المحمول بس لأ دي كمان شركات تصنيع التليفونات زي نوكيا واريكسون وكده...يعني فودافون بتستمد قوتها تجاريا وعلميا كمان كواحدة من اقدم مقدمي الخدمة في العالم
وعلى مستوى سوق الاتصالات العالمي هتلاقي اكبر شركة قدام فودافون هي شركة اورانج تليكوم ودي بتدير 22 شركة على مستوى العالم وشريكة في 6 شركات بنسبة اسهم اقل من 50% ومنهم موبينيل واورانج ابتدت تقدم الخدمة سنة 1991 يعني بعد فودافون ب 8 سنين
يعني بمقايس النسبة والتناسب اللي العالم كله بيتعامل بيها وبمقاييس الارقام اللي مافيهاش مجاملة فودافون هي اقوي شبكة على مستوى العالم
فاضل مقاييس الجودة..... تقدري حضرتك تقوليلي ايه في حياتنا على كوكب الارض وفي جميع مناحي الحياة سواء علميا او صحيا او حتى معنويا بيصل لمرحلة الكمال بنسبة 100%؟؟....مافيش
مش كون فودافون اقوى شبكة في العالم يمنع ان خدمة العملاء تقع لفترة من الوقت (وهقولك السبب كان ايه)ء
مش كون فودافون اقوى شبكة في العالم يمنع ان يكون في بعض المناطق شبكتها وحشة ( واوقات كتير ليها سبب وان كان مش موضوعنا)ء
مش كون الياهو ترتيبه رقم واحد في الاستخدام كموقع انترنت يمنع اني في يوم الاقيه واقع
مش كون جوجل بقى ملك الانترنت يمنع اني كذا مرة ادخل على الحساب بتاعي وتطلعلي رسالة اعتذار لوقوع الخدمة
مش كون نوكيا اكبر مصنع للتليفونات المحمولة يمنع ان يكون في عيوب في البطاريات اللي صنعتها وبدأت تسحبها من السوق تاني
مش كون لينك دوت نت شركة كبيرة في البروفايدرس يمنع اني لما ادخل مرة الاقي النت واقع
ولو عايزة 100 مثال تاني هقولك
بصي...اي تصميم في الدنيا...اي تقرير طبي...اي توصية لاي حاجة في حياتنا بتحط حاجة اسمها " نسبة الخطأ المقبولة"...لازم يكون في نسبة خطأ
ادخلي على موقع الانترناشيونال تليكومينيكيشن يونيون ( اسف مش عارف اكتب انجليزي ع البلوجر) ودا اللي بيحط الاستاندرد بتاع اي حاجة تخص الاتصالات وشوفي الاستاندرد بيسمح بنسب خطأ قد ايه...بلاش ادخلى على موقع منظمة الصحة العالمية وشوفي بردو الدراسات والابحاث بتتكلم بدقة كام في المية
اللي اقصده ان الخطأ وارد...وكون الخطأ حصل من طرف ما ده لايعني بالمرة ان الطرف ده مهمل او سيء او لايستحق اسمه ولا يعنى ان يقابل بالاستهزاء زي ماكتبتي في مدونتك...المقياس هو ايه رد الفعل وهل الخطأ دا بيتكرر كتير ولا لأ وعلى فكرة انا مش بتكلم عن فودافون بس انا بتكلم عن اي شركة تانية بتقدم خدمة وممكن يحصل فيها خطأ وقلتلك امثلة كتير فوق

دا بالنسبة لمفهوم اقوى شبكة في العالم

اما بالنسبة لكلامك في المدونة واللي مشكورة كتبتيلي اللينك بتاعه فهو جزأين...هبدأ بالجزء التاني واللي نقلتيه باستغراب واستعجاب من الموقع بتاع فودافون وهو بيتكلم عن الموظفين والاهداف واتفاقيات التجوال ودا ماليش اي تعليق عليه لانه حقيقة واقعة حتى وان كنتي مستغرباها ومستعجباها

اما الجزء الاول فكل بساطة الايام اللي فاتت كانت خدمة العملاء غير متاحة بسبب الضغط الرهيب اللي حصل بعد نزول عرض "اهم خمسة"... وخصوصا ان العرض بياخد وقت في شرحه للعميل ..انا نفسي اتصلت اسأل على حاجة تخصني ورغم ان بتحول عن طريق خط ساخن الا اني قوبلت باعتذار من زمايلي في خدمة العملاء نظرا للضغط الشديد اللي كان عليهم واهو قالوا يجيوا عليا احسن مايجيوا على العملاء
مش معنى كده ان مابتحصلش مشاكل وساعات ال 888 بتقع..لا بتحصل بس وقتها بيكون في طوارئ وخصوصا ان المكالمة بتعدي على كذا شبكة (منهم شبكات خارج شبكة فودافون اصلا) قبل ماتوصل لموظف خدمة العملاء

نقطة تانية يمكن ناس كتير ماتعرفهاش وان كانت بتثبت نجاح وقوة خدمة العملاء في فودافون مصر...ان شاء الله لما

تسافري استراليا او نيوزلندا وتجيبي خط فودافون هناك..لما تحبي تكلمي خدمة العملاء بتاعتهم اعرفي ان اللي بيرد عليكي ويقدملك الخدمة واحد مصري وقاعد على مكتبة في 6 اكتوبر في مصر

كلمة اخيرة:- كلنا عايزين افضل حاجة وافضل خدمة واروع نظام لكن ده مش معناه ابدا انكار او الاستهزاء بمجهود ناس كتير اوي لمجرد خطأ مش بيتكرر كتير وخصوصا ان الناس دي بتتعب اوي عشان مجرد ماتحب تتكلم تلاقي شبكة تتكلم عليها

والمقارنة خير برهان

خالص تحياتي واحتراماتي للاستاذة دينا واهلا بيكي دايما ضيفة عزيزة ع المدونة...شرفتيني

فودافون

خلال السنة اللي فاتت وتحديدا من شهر يونيو 2006 وقت ما اتغير اللوجو من " مش بس كلام" وبقا "ماتفوتش لحظة" ابتدت الحملة الاعلانية تتكلم بصيغة "فودافون اقوي شبكة في العالم" ولاحظت ان الكلمة دي كانت مستفزة لناس كتير من اللي شافوها وخصوصا بقا لو الشبكة عندهم وحشة
عشان كده انا حبيت يكون من اول موضوعاتي في المدونة انى اقول هي مين فودافون وتمثل يه في سوق الاتصالات
اصل الحكاية يرجع لسنة 1983 لما الحكومة البريطانية عرضت تراخيص انشاء شبكة تليفون محمول ووقتها كانت احدى الشركتين اللي كسبت الترخيص شركة اسمها راكل الكترونيكس اللي ابتدت تقدم خدمة المحمول تحت اسم راكل تليكوم بنسبة استحواذ 80% وبعدها اشترت باقي الاسهم من المساهمين وانفصلت عن راكل الكترونيكس الشركة الام لتقود وحدها سوق الاتصالات تحت اسم مجموعة فودافون سنة 1991.ء
فودافون من اقدم شركات الاتصالات على مستوى العالم ونشاطها مش مجرد نشاط تجاري بس لا فودافون تعتبر واحدة من الاعضاء الرئيسين في اللجان القياسية اللي بتحط الستاندرد بتاع تكنولوجيا وصناعة الاتصالات على مستوى العالم وليها ثقل كبير على المستوى العلمي

فودافون تبقى اقوى شبكة على مستوى العالم عشان بتدير 25 شبكة تليفون محمول منهم فودافون مصر وشريك رئيسي في 40 شبكة محمول اخرى وعدد عملائها على مستوى العالم 207 مليون مشترك
فودافون مصر طبعا ابتدت تقديم الخدمة سنة 1998 تحت اسم كليك ودا كان بعد موبينيل بكام شهر وان كانت فودافون ( او كليك وقتها) كانت سباقة في اصدار نظام الكروت المدفوعة مقدما واللي مثل اقتحام شديد للسوق وقتها لان موبينيل كانت شغالة نظام فواتير بس. وقتها كانت النسبة الاكبر من الاسهم مملوكة لرجل الاعمال محمد نصير ولكن بعد كده تمت اعاده توزيع الاسهم واصبحت فودافون موزعة على مجموعة فودافون العالمية بنسبة 50% والمصرية للاتصالات بنسبة 25% والنسبة الباقية كانت موزعة بين بنك القاهرة ورجل العمال محمد نصير وبعض المساهمين الاخرين. الكلام دا كان لغاية 2006 لما وقتها اعلنت المصرية للاتصالات الحاجة لشراء اسهم فودافون واصبحت اسهم فودافون بين شريكين رئيسين المصرية للاتصالات بنسبة 45% ومجموعة فودافون بنسبة 55% ودا الوضع الحالى.ء

على مستوى العالم فودافون ليها انشطة كتير في معظم مجالات الحياة من رياضية واعلامية وصحية واعمال خيرية ولكن مايهمني هو فودافون مصر وانشطتها الخيرية اللي فعلا ناس كتير ماتعرفش عنها أي حاجة وهو دا اللي هركز عليه في بوستات كتير الفترة اللي جاية ان شاء الله
وعشان كل اللي فات ده كان الاعلان بيقول

مع فودافون

انت مع اقوى شبكة في العالم

انا فودافون

انا فودافون...كلمة باعتز بيها كعميل فودافون من سنة 2000 وباتشرف حاليا بيها كموظف فيها....فودافون بالنسبة لناس كتير هي شريحة الموبايل اللي محطوط في جيبه وبيتكلم منه وزيها زي غيرها وبالنسبة لناس تانيه كتير بردو هي شركة (طبعا مع موبينيل واتصالات) بتمص في دم الناس وفي جيبوهم وبتسرقهم عيني عينك وناس تانيه كتير زي حالاتي كده مقتنعين بيها جدا جدا- انا كنت دايما معتز جدا بخطي الفودافون حتى في الايام اللي اشتغلت فيها مع موبينيل عشان كده انا حبيت اعمل المدونة دي اللي اتمنى انها تعجبكوا وانكوا تشاركوني فيها- انا ناوي ان شاء الله ابني مواضيع المدونة على تلات محاور ( زي فارس بلا جواد كده)ء

اولا..هاتكلم عن فودافون الاسرة والمجتمع الصغير والشركة اللي ناس كتير مايعرفوش حاجة عن انشطتها وتأثيرها في حاجات كتير في المجتمع المصري...هاتكلم عن مواقف بتحصلى وخصوصا اني على احتكاك مباشر بشبكة التغطية في بر المحروسة كله وبمشاكل العملاء وبمواقف ظريفة بتحصل كتير من العملاء وشكواهم

ثانيا.. هتكلم بردو في المدونة عن تكنولوجيا الاتصالات عموما واتصالات المحمول خصوصا وازاي بتحصل وازاي بتقدر تتكلم والفرق بين الجيل الاول والتاني والتالت والحاجات دي وعن بعض المشكلات اللي بتظهر وانت بتتكلم ع الموبيل والفرق بين المكالمة العادية ومكالمة الفيديو وكده يعني

ثالثا...هستقبل من اصدقائى الاعزاء قراء المدونة اي اقتراحات بخصوص حاجة مش بتحبها في فودافون او خدمة شايف انها المفروض تكون موجودة ..والافكار دي انا هوصلها فعلا من خلال قنوات معينة جوا الشركة ومجرد مااستلم الرد هاقول عليه علطول ...كمان هاحاول قدر الامكان ارد على اي اسئلة بخصوص هندسة الاتصالات عموما – بيقولوا عليا مهندس شاطر بس اكيد مش بعرف لسه حاجات كتير واكيد هاستفيد من اي سؤال هتسأله وابحث عن اجابته

كلمة اخير احب اقولها...المدونة دي ليست اعلان...انا بتكلم عن فودافون ككيان وكشركة اثرت في اخلاقيات وسلوكيات كتير في حياتي ..ورغم كده ممكن اتكلم عن عروض جديدة من وجهة نظري الشخصية او اوضح خدمة جديدة ممكن ماتكونش واضحة او محدش يعرف عنها حاجة

اتمنى ان المدونة دي تكون خفيفة وظريفة..اتمنى اني اقدر اوصل بيها معلومة مفيدة...الامور مش واضحة اوي بالنسبة ليا في الاول..انا ابتديت وهانتظر مشاركتكوا عشان اقدر اكمل
تحياتي
محمد سمير